– Arctic Umiaq Line matuneqassanngilaq

Qaqortumi, Nuummi Ilulissanilu mittarfissuit tamarmik atulerpata Arctic Umiaq Line atorunnaassasoq umiarsuarlu sinersortaat Sarfaq Ittuk tunineqassasoq siusinnerusukkut politikkikkut siunniunneqarnikuuvoq, taamaakkaluartoq umiarsuaatileqatigiiffik matuneqarani inerisaaffigineqartariaqartoq Arctic Umiaq Linep pisortaa Taatsiannguaq Olsen isumaqarpoq.

Arctic Umiaq Linep siunissaa nalorninartorsiorfiugaluartoq sinersortaatip nutaap 300-t missaannik ilaasoqarsinnaasup containerinillu 20 fodinik arfineq pingasunik usisinnaasup titartagartaa naammassereerpoq, taannalu piviusunngortinneqarumaartoq pisortap neriuutigaa.

Arctic Umiaq Line matuneqarani akerlianik inerisaaffigineqartariaqartoq Inatsisartuni ilaasortat partiini assigiinngitsuneersut isumaqarput. Arctic Umiaq Linemulli taarsiullugu imaatigut ilaasunik angallassisartut namminersortut periarfissarsiuunneqartariaqartut Atassut isumaqarpoq.

Inatsisartunut ilaasortaq Bo Martinsen, Demokraatit:

- Inuit ilaasa umiarsuarmik angalanissaq orniginartinnerusarpaat. Nalunngilara 2023-mi Arctic Umiaq Linep allanngortiterneqarnerata kingorna iluatsippallaarsimanngitsoq, kisiannili imminut akilersinnaasumik ingerlalernissaa pillugu aqutsisut nutaat sulinerat upperaara.

- Silaannakkut imaatigullu ilaasunik angallassineq siunissami periarfissaajuaannartariaqartoq isumaqarpunga. Arctic Umiaq Linelu siunissaq pillugu periusissiamik illersorneqarsinnaasumik takutitsisinnaappat, kiffartuussinissamut isumaqatigiissut ukiunik tallimanik sivitsorneqarnissaa nutaamillu umiarsuartaarnissamik pilersaaruteqarnera tapersersinnaavara.

Lars Poulsen, Siumut:

- Arctic Umiaq Linep matuneqarani piujuarnissaa pisariaqartoq nammineq inuttut isumaqarpunga. Silaannakkut ilaasunik angallassineq annertuumik inerisaaffigineqarpoq, tassungalu atatillugu nunap immikkoortuini mittarfiit, soorlu Paamiuni, Maniitsumi aamma Sisimiuni sananeqarnikuupput, taakkualu saniatigut mittarfissuit nutaat pingasut Qaqortumi, Nuummi Ilulissanilu sananeqarlutik.

- Taamaakkaluartoq silaannakkut ilaasunik angallassineq suli annertuumik unammilligassaqarfiuvoq, taamaattumillu imaatigut ilaasunik angallassineq suli annertuumik pisariaqartinneqarpoq.

- Arctic Umiaq Linep sinersortaat nutaaq titartartissimasaa containerinik usisinnaavoq, tamannalu isorliunerusuni pilersuinermut iluaqutaassaaq. Taamaattumik Arctic Umiaq Linep nutaamik piginnaaneqarnerusumillu sinersortaatitaarnissamik sanasoqarnissaanik kissaateqarnera tapersersorpara.

Inatsisartunut ilaasortaq aamma Avannaata Kommuniani 1. viceborgmesteri Jens Napãtôᴋ', Naleraq:

- Upernavimmut nuunnerma kingorna nunatta isorliunerusuni sinersortaatit pinngitsoorneqarsinnaanngitsut paasinikuuara. Assersuutigalugu Uummannami Upernavimmilu taakkulu nunaqarfiini silaannakkut ilaasunik angallassineq kipiluttunartorujussuuvoq, tamannalu ilorraap tungaanut saatinneqassappat imaatigut ilaasunik angallassineq tamaani inerisaaffigineqartariaqarpoq.

- Taamaattumik Arctic Umiaq Linep anginerusumik amerlanerusunillu ilaasoqarsinnaasumik sinersortaatitaarnissamik kissaateqarnera tamakkiisumik tapersersorpara.

- Norgemi illoqarfeeqqat nunaqarfeeqqallu sinersortaammik tikinneqartarput, tassangalu atatillugu nioqqutissanik poortukkanillu aamma pilersorneqarput, taamaattumik tassunga assingusumik nunatsinni ineriartortitsisoqarnissaa ilanngullugu misissorneqartariaqartoq isumaqarpunga.

Atassutip siulittaasua aamma inatsisartunut kiisalu Avannaata Kommuniani kommunalbestyrelsimut ilaasortaq Aqqalu C. Jerimiassen, Atassut:

- Arctic Umiaq Line suliffeqarferujussuuvoq ataasiinnarmik sinersortaateqartoq, ingerlatseriaaserlu taama ittoq apeqqusernarpoq. Nunarsuaq tamakkerlugu sinersortaatinik angisuunik atuineq atorneruukkiartorpoq. Assersuutigalugu Disko Line A/S angallassisartullu allat mikisunik arlalinnik ilaasunik angallassissutaateqarput, tamannalu iluatsilluartutut nalileqarsinnaavoq, tassungalu assingusumik ineriartortitsisoqarnissaa periarfissanut ilaasinnaavoq.

- Assersuutigalugu Ilulissani takornarialerisut kattullutik piginneqatigiiffiat Ilulissat Excursions ApS Qeqertarsuup Tunuani neqerooruteqassallutik oqaatiginikuuat, tamakkulu suna tunniunniaraat paaserusunnarpoq.

- Arctic Umiaq Linep nutaamik anginerusumillu sinersortaatitaarnissamik kissaateqarnera siumoortumik akerlerinngilara, kisianni siunissami imaatigut ilaasunik angallassinermi periarfissat assigiinngitsut qulaajarneqartariaqartut isumaqarpunga.

Inatsisartunut ilaasortaq aamma angallanneq pillugu oqaaseqartartoq Nivi Hielmann Efraimsen, Inuit Ataqatigiit:

- Silaannakkut ilaasunik angallassineq maannakkumut annertuumik ajornartorsiorfiusoq takusinnaavarput, taamaattumik imaatigut ilaasunik angallassinerup periarfissaajuarnissaa pisariaqarpoq.

- Arctic Umiaq Linep matuneqarnissaanik aalajangertoqassappat tamanna isumatusaarnerussanngitsoq, akerlianilli umiarsuaatileqatigiiffik inerisaaffigineqartariaqarpoq. Taamaattumik Arctic Umiaq Linep pisortaata Taatsiannguaq Olsenip umiarsuaatileqatigiiffiup ingerlannarnissaanik nutaamillu umiarsuarmik ilaasartaatitaarnissaanik kissaateqarnera tamakkiisumik tapersersorpara.