Arnamik toqutsisimasutut tigummigallarneqarnissaa piumasarineqarpoq
Sapaatip-akunnerata tulliani Nuummi arnamik toqutsisoqarneranut atatillugu eqqartuussineq aallartissaaq. Toqutsinerup kingorna arnap inissiaa toqutsisup ikuallatsippaa.
Assiliisoq: Leiff Josefsen
Mianersoqqussut: Allaaserisami matumani toqutsineq pillugu paasissutissaqarpoq.
2023-mi januarip 31-anni arnap utoqqaap peqqarniitsumik toqutaanerata inuiaqatigiit aalassatsippai. Arnaq inissiamini toqutaavoq, kingornalu toqutsisup inissiaq ikuallatsippaa, inissiami najugaqartut allat navianartorsiortillugit.
Paasiniaanermut atatillugu angut taamani 20-nik ukiulik politiinit tigusarineqarpoq, taannalu sapaatip-akunnerata tulliani eqqartuussivimmi sassartinneqartussaaq.
Maanna 22-nik ukioqarpoq, piffissaligaanngitsumillu tigummigallarneqarnissaa unnerluussisup piumasaraa.
2023-mi januaarip 31-anni ullaakkut nalunaaqutaq 05.30-p missaani angut arnap inissiaanut peqquneqarnani isersimasutut unnerluutigineqarpoq.
Ikuallatsitsisimasutut navianartorsiortitsisimasutullu unnerluutigineqartoq
Unnerluussissut naapertorlugu angutip arnaq atortunik unatarlugu toqussimavaa.
Aamma angut pinngitsaaliilluni arnerisimasutut toqungasullu timaanik assuarnartumik ikkatiginnissimasutut unnerluutigineqarpoq.
Unnerluutiginnissut naapertorlugu angut taanna imerpalasut ikuallajasut atorlugit inissiaq ikuallatsissimavaa.
Tamanna inissiami ajoqusiingaatsiarpoq, qujanartumilli silaannaap amigaataanera qatserisartullu ornigunnerat pissutigalugit ikuallanneq inissianut allanut siaruaatinngilaq, unnerluussummi allassimavoq.
22-nik ukiulik 2023-mi januaarip 31-ianni pinerluttuliornerup saniatigut aamma 2022-mi juulip 15-ianni kannguttaatsuliorsimasutut unnerluutigineqarpoq.
Ullut pingasut eqqartuussiffissatut immikkoortinneqarsimapput, suliarlu ataasinngorpat Sermersuup Eqqartuussiviani aallartissaaq.
