Arnap maqaasineqartup ujaarineqarnera unitsinneqarpoq

Arnap 67-inik ukiullip Nanortalimmi kingullermik takuneqarneranit ullut qulit qaangiuttut ujaasineq unitsinneqarpoq.

Kalaallit Nunaanni Politiini pigaartut pisortaat Aputsiaq Hansen taama paasissutissiivoq.

Ujaasineq sapaatip-akunnera kingulleq tamaat ingerlanneqarpoq, ataasinngornermili ualikkut unitsinneqarpoq.

Politiit illoqarfimmi illoqarfiullu eqqaani ujaasingaatsiarsimapput, kisianni nassaarnatik, Aputsiaq Hansen oqaluttuarpoq.

- Innuttaasut, qatserisartut politiillu ujaasinermi suleqatigiipput, innuttaasullu ikiuuttut qutsavigingaarpavut, pigaartut pisortaat nangippoq.

Ujaarineqartoq nassaarineqarsimanngimmat inuit suliamut tunngatillugu paasissutissaateqarunik suli politiinut saaffiginnissinnaasut oqarpoq.

Arnaq maqaasineqartoq puiguttortuuvoq, politiillu arfininngornermi apriilip tallimaani ullup-qeqqata siorna kingullermik takuneqartoq siusinnerusukkut nalunaarutigaat.

Ilaqutaasut ilisimatinneqarsimasut pigaartut naalagaat oqarpoq.