Arnaq atorfilittaq aalakoorluni biilersimasutut aporsisimasutullu unnerluutigineqartoq
Arnaq inuiaqatigiinni pingaarutilimmik inissisimasoq aalakoorluni biilersimasutut, biilinut allanut apuisimasutut taamaseriarlunilu qimaasimasutut unnerluutigineqarpoq. Atermik saqqummiussisoqassanngitsoq tusagassiorfimmit akerlilerneqaraluartoq eqqartuussisup aalajangiuppaa. Arnaq pisuunnginnerarpoq.
Suli aallartinngilaq. Sisamanngornermi eqqartuussineq Nuummi ingerlanneqarpoq illersuisup atsiisitsineq pillugu qinnuteqarnera suliaralugu.
Foto: Morten Okkels
Arnaq aalakoorluni biilersimasup unnerluutigineqarneranut suliaq Eqqartuussisoqarfik Sermersuumi sisamanngornermi ualikkut atuarneqarpoq. Suliami pineqartoq Nuummi 2024-mi decembarip qaammataani pisimasuuvoq.
Unnerluussut naapertorlugu arnap talerpimmut sangoriami aqqorliorluni biilimut allamut aporsimavoq. Taamaaleriarluni apukkaminut attaveqarani sumiiffimmit qimaasimalluni.
Aavani 1,32 promillemik aalakoornartortaqartoq kingorna aaversinnerani paasineqarpoq. Imigassartorsinnaanermut killigititaq 0,50 promilleuvoq.
Eqqartuussivimmi pisuutinneqaruni akiligassinneqartussaavoq biilersinnaanermullu allagartaminik arsaarneqarsinnaalluni. Pisuunnginnerarallartoq illersuisuisa paasissutissiivoq.
Eqqartuunneqartussaq qanittukkut pisortani pingaarutilimmik tatigineqartumilu atorfinitsinneqarmat suliap malinnaaffigineqarnissaa pissusissamisoorpoq.
Aternik saqqummiusseqqusaannginneq eqqartuussisup sisamanngornermi aalajangiummagu tamanna itisilersinnaanngilarput. Taamaattumik allanik paasissutissanik taasaqarsinnaanngilagut arnap kinaassusaa illersorneqarmat.
Arnap atorfilittap illersuisuata atermik saqqummiusseqqusinnginneq tamanna piumasaraa. Suliaq tamanut soqutiginarmat Sermitsiamit KNR-imiillu tamanna akerlilerneqaraluarpoq. Eqqartuussisulli aalajangiineranut tamanna sunniuteqanngilaq.
Arnap aqqanik saqqummiussineq pisariaqanngitsumik kanngunarsaanermik kinguneqarsinnaasoq, aamma pisoq arnap suliffianut attuumassuteqanngimmat eqqartuussisoq taama aalajangerpoq.
Arnap eqqartuunneqarnera maajimi aallartissasoq naatsorsuutigineqarpoq.
