Arnat atugarliortut ikiorneqarnerulerput

Ivalo Frederiksen 33-nik ukiulik assigiinngitsorpassuarnik misilittagaqarsimavoq. Odensemi inunngorpoq. Atualilerami Qasigiannguanut nuuppoq. Narsami aamma najugaqallatsiarnikuuvoq.

- Atuarunnaalerlunga Danmarkimut uterpugut, Kalaallillu Nunaanniittut allat assigalugit ilisarisimasatsinnut nuuppugut, ilaqutariiulluta nammineerluta angerlarsimaffeqalinnginnitsinni. Nykøbing Falsterimi atuarpugut. Pigisalerituutut ilinniarpunga, paasivarali pisiniarfimmit allaanerusumik inunnik sullissisariaqarlunga.

- Taamaattumik Odensemi isumaginninnermut siunnersortitut ilinnialerpunga qimarnguffimmilu aalajangersimasumik paarlaasuullunga. Tassani arnat persuttagaasimasut naammattooqqaarpakka.

-Soqutigilerpara, tamatumalu kingorna Redenimi arnanik kalaallinik arnanillu allanik Redenimik atuisunik sullissisalerpunga, Odensemi illoqarfiup qeqqani Redenimi inini nuannersorpassuarni nuannersumik oqaloqatigiinnermi, Ivalo Frederiksen oqaluttuarpoq.

Ukiuni arlalinni arnat kalaallit Redernemut orniguttartut pillugit Danmarkimi Rederne iliuuseqarusunnikuuvoq, Isumaginninnermullu Aqutsisoqarfiup tapiissutaa iluaqutigalugu tamanna iluatsissimavoq.

Suliniut piffissaligaavoq

Ukiuni marlunni affarmilu suliniummut Isumaginninnermut Aqutsisoqarfik aningaasanik immikkoortitsisimavoq, ukioq mannalu decembarip naanerani tamanna qaangiutissaaq.

- Sulinitsinnik ingerlatitseqqiinnarsinnaanerput neriuutigisorujussuuara, pisariaqartinneqaqaagummi, Ivalo naqissusiivoq.

Ukioq mannaannaq arnat 149-t Redenimut ilanngussimapput. Taakkunannga 49-t kalaaliupput. Immaqa kaapput, siniffissaqartariaqarput, arlaannik ikiorneqartariaqarlutik oqaloqatissaaleqilaarlutilluunniit. Kalaallinut atuisunut Ivalotut kalaallisut tunuliaqutaqartumik atassuteqarunik soorunami ajornannginnerussaaq. Amerlanerit aamma qallunaatut oqalussinnaavallaanngillat, Danmarkimilu digitalimik atortorissaarutit atoruminaassinnaapput, tassanilu Ivalo ikiuutaasinnaavoq.

- Pisariaqartinneqarpat oqaloqatigiinnernut artornartunut orniguteqataasinnaavunga, ajornartorsiutilluunniit paasiuminaappata ikiuisinnaallunga. Soorunami aamma atuisut angerlarsimaffiini naapissinnaavakka.

Nerisassat sapangaaqqerinerlu

Kalaaliminernik sassaalliisoqaraangat sapangaaqqeraluniluunniit ilorrisimaartitsisoqaraangat, Soorunami kalaallit Redenimik atuisut nuannarisarpaat.

- Assersuutigalugu eqalunnik nerisassiortoqaraangat nuannaarnerat takullugu nuannertaqaaq, Ivalo nangippoq.

Soorlu arnaq qanittukkut eqalunnik sassaalliisoqarmat ima oqarsimasoq: Maanna kalaaliuneq nuannerpoq. Arnat kalaallit Redenimukartartut piginnaasaqarluarput, amerlasuullu isumassarsiullaqqissuupput. Nukittuffiisa ilagaat amerlasuut imminnut ilisarisimanerat.

- Assigiinngitsunik nalaatallit naapittarlugit aallaqqaammut soorunami artornarpoq, Ivalo nangilluni oqaluttuarpoq.

- Sullitama qanillivallaannginnissaat akuleruffigivallaarnaveersaarnissaallu ilinniarnema nalaani soorunami ilinniarpara. Tamanna ilaannikkut ajornakusoortarsinnaavoq.

- Qujanartumik Redenimi avataaniillu tarnip pissusaanik ilisimasalimmit siunnersorneqarsinnaavunga.

Ivalo Redenilu Kalaallit Illuutaannik suleqateqarput.

Suleqatini ilinniartittarai

Ivalop kulturikkut suliaqarnini iluaqutigaa, kalaallimmi atugaat pillugit minnerunngitsumillu Danmarkimi kalaaliuneq qanoq ittuusinnaanersoq pillugu suleqatini ilinniartittarpai.

- Naak artornartaraluartoq, silarsuarmi suliffiit pitsaanerpaat ilaat suliffigaara. Arnat ataasiakkaat pisariaqartitaannut naleqqussarnissamut piffissaqartarpunga, Ivalo Frederiksen Odensemi Redenimi ataatsimiittarfimmi oqaloqatigiinnermik naggasiivoq.