Arnat spiralilerneqarsimasut utoqqatserfigineqarnerat Folketingimi Kalaallit Nunaat pillugu ataatsimiititaliap pingasunngornermi malunnartippaa.
Arnanut Nuummi utoqqatsertoqarnerani najuussinnaasimanngitsunut utoqqatserneq taakkununnga aamma atuunnera ersersinniarlugu aaqqissuussisoqarpoq.
Arnat spiralilerneqarsimasut utoqqatserfigineqarnerat Folketingimi Kalaallit Nunaat pillugu ataatsimiititaliap pingasunngornermi malunnartippaa.
Arnanut Nuummi utoqqatsertoqarnerani najuussinnaasimanngitsunut utoqqatserneq taakkununnga aamma atuunnera ersersinniarlugu aaqqissuussisoqarpoq.
Elisa T. L. Christensen Folketingip ataatsimiittarfianni malunnartitsinermi oqalugiartut ilagaat.
Assi: Trine Juncher Jørgensen
Aammattaaq arnat suliniuteqarluartut nersorneqarput. Taakkuupput eqqartuussissuserisoq Mads Pramming tusagassiortut DR-imi "Spiralkampagnen“-imik atserlugu podcastimik suliaqartut Anne Pilegaard Petersen aamma Celine Klint.
Elisa T. L. Christensen aamma Naja Lyberth oqalugiarput, aamma peqqissutsimut nunamullu namminermut ministerip Sophie Løhdeo (V) inuulluaqqussutaa immiussaq takutinneqarpoq. Erinarsoqatigiit Avaat aamma Karina Møller erinarsorput.
Tapersersuineq akuersaarnerlu
Arnat peqataasut ilaasa, Bitha Methelmannip Debora Kleistillu, aaqqissuussaq pissarsiaqaatigalugulu oqiliallaatigaat.
Arnat 100-t missaanniittut aaqqissuussamut peqataapput. Tapersersoqatigiiffimmik pilersitsisoq Naja Lyberthip inuulluaqqussutaa immiussaq takutinneqarmat nikuilluni ersaattaanneqarpoq.
– Misigisamasavut akuersaarneqarsinnaanngimmata tapersersorneqarnerput akuersaarneqarnerpullu iluarpoq, Debora Kleist oqarpoq. Taanna 14-inik ukioqarluni Paamiuni skolehjemimiinnermini, Forstanderip oqarnera naapertorlugu Debora Kleist perungammat, spiralilerneqarnikuuvoq.
- Taamatulli misiginngikkaluarpunga, pisuusutut kukkusutullu misigaanga.
Debora Kleistip napparsimmavimmi pisoq sakkortugalugu matoorsimavaa, kingornalu iluluttalissutigalugu.
– Naartunerma qaammatip pingajussaani katatsivunga. Naartuleqqippunga ernertaarlungalu, naartuuneranilu katangajattarsimavara. Aamma illissap paavatigut naartulerpunga, 2017-imilu illiaartillunga. Ajoquterpassuannut spirali pissutaanersoq naluara, arnarpassuuvugulli assigusunik aqqusaagaqarsimasut, Debora Kleist oqarpoq. Taanna spiralilerneqarsimasunut tapersersoqatigiiffimmi, Naja Lyberthimit 2022-mi aallartinneqartumi, ilaavoq.
Taarsivigineqarnissamik apeqqut
Bitha Metelmann qujanartumik inuusuttuulluni spiralilerneqarnikunut ilaanngilaq, arnalli ukioqatini misiginneqatigingaarpai.
– Nuummi utoqqatsertoqarnerani aallakaatitaq toqqaannartoq malinnaaffiginerani Danmarkimilu aamma aaqqissuussisoqarnissaa tusarakku killitsippunga peqataanissaralu siunniullugu. Pisimasut amiilaarnaqaat, misigivungali iperaasinnaanngorluta ingerlariaqqissinnaanngortugut. Arnalli taarsiivigineqartariaqartut isumaqarpunga. Amerlasuut tarnip pissusaanik ilisimasalimmik oqaloqateqarnissartik pisariaqartippaat, tamannalu akunnernik marlunnik sivisunerusariaqarpoq, Bitha Metelmann oqarpoq.
IA sinnerlugu Folketingimut ilaasortaq Aaja Chemnitz utoqqatsernermik malunnartitsinermik, pingasunngormat Folketingip ataatsimiittarfianni pisumik, suliniuteqartuuvoq.
Assi: Trine Juncher Jørgensen
Saammaasseqatigiinnissaq pillugu aningaasaateqarfik arnanut eqqugaasunut taarsiissuteqarfiusussaq maanna sulissutigineqartoq, Kalaallit Nunaat pillugu ataatsimiititaliami siulittaasoq Aaja Chemnitz oqarpoq.
"Utoqqatsernissaq alloriarneruvoq siulleq. Taarsiisoqarnissaa tarnillu pissusaanik ilisimasalimmik ikiortittoqarnissaa qulakkeertinnagu unittoqarnavianngilaq."
