Arnold Schwarzeneggerip Trump mianersoqqussutigaa Kamala Harrisillu tapersersorlugu

Isiginnaartitsisartoq Arnold Schwarzenegger, republikanerit sinnerlugit Californiami guvenøriusimasoq, USA-mi præsidentimut qinersinermi Demokraatineersoq Kamala Harrisip tapersersorniarlugu aalajangiusimavoq.

Taama allappoq inuit attaveqaqatigiittarfianni X-imi.

Donald Trumpip ajugaasinnaanera pillugu Schwarzenegger ima allappoq:

- Ajugaassappat ukiuni sisamani tullerni oqaluinnarnerussaaq angusaqarfiunaniluaasit, taama pisoqassappat kamannerujartuinnalissaagut uumissuinerulerlutalu.

- Amerikami oqaluttuarisaanermi kapitali taanna matusariaqarparput, nalunngilaralu Donald Trump taamaaliornavianngitsoq.

Schwarzenegger Østrigimi inunngorpoq, ukiorpassuarnili USA-mi najugaqarluni, taamaattumillu USA-mi Østrigimilu innuttaassuseqarluni.

2003-miit 2011-mut Californiami guvernøriuvoq.

- Siullertut Amerikamiuuvunga, tullertullu republikanerinik tapersersuisuullunga. Taamaattumik Kamala Harris Tim Waltzilu sapaatip akunnerani matumani qinissavakka, allappoq.

Tim Walz Demokraatinit vicepræsidentinngorniarpoq.

Præsidentimut qinersineq novembarip tallimaanni pissaaq, qinersisartulli amerlasuut qinersinissaq sioqqullugu taasisinnaapput, tamannalu Schwarzeneggerip aamma pilersaarutigaa.

Schwarzenegger X-imi allappoq nalinginnaasumik præsidentinngorniartumik avammut nalunaaruteqarluni tapersersuinaviarnani. Qinersinissamili matumani isummani nalunaarutigisariaqartutut misigisimavoq.

- Paasivara inuit tusarusukkaat, tusaamasaaginnarnera pinnagu, aammali Republikanerit tunuliaqutaralugit guvernøriusimanera pillugu, Schwarzenegger allappoq.

Taanna allappoq politikki tassaasoq politikkikkut anguniagaq anguniarlugu politikkikkut illuatungiliuttunik suleqateqarsinnaaneq — tassaanngitsorlu „qinersinermi tulliuttumi ajugaajumalluni illuatungiliuttunik qinngarsuineq“.

- Unneqqarillunga oqassaguma: Partiit arlaannaalluunniit maanna nuannarinngilakka. Partiima Republikaneriusup niuerneq kiffaanngissuseqartoq puigorluinnarsimavaa, amigartoorutit amerlisimallugit qinersinerillu inerneri akueriumasimanagit.

- Amigartoorutit Demokraatinit iluarsiniarneqarsinnaanngillat, ernumassutigaaralu illoqarfinni politikkiat illoqarfitsinnut ajoqutaassasoq pinerluttuliornerit amerliartornerisigut, Schwarzenegger allappoq.

Isiginnaartitsisartoq nangilluni allappoq „Amerikamiunut naleqqutinngitsoq“ qinersinerup inernera akuersaanngikkaanni. Præsidentimut qinersinermi 2020-mi tamanna misigineqarpoq, Donald Trumpip qinersinerup inerneri akueriumanngimmagit.

Kongressip qinersinermi inernerit akuerimmagit, Demokraatineersorlu Joe Biden præsidentinngormat, Trumpimik tapersersuisut Washington D.C.-mi Kongressip allaffia saassuppaat.

Schwarzeneggerip guvernøriunerata nalaani Harris Californiami senatoriusimavoq.

/ritzau/