Arsat 1000-it kommunimut tunissutigineqartut
Otto Motzfeldtip arsaannermik nuannarinninneq ingerlateqqikkusukkamiuk arsanik 1000-inik Avannaata Kommunianut tunissuteqarpoq.
Otto Motzfeldtip arsanik 1000-inik Avannaata Kommunianut tunissuteqarnera Avannaata Kommuniani borgmesterip Palle Jerimiassenip nuannaarutigaa.
Assiliisoq: Avannaata Kommunia
Otto Motzfeldt Qaqortumi inunngorpoq peroriartorlunilu, 1979-imili Danmarkimi najugaqarluni.
Nammineq isikkamik arsaannermik ukiorpassuani nuannarisaqarpoq, nuannaarnerlu tamanna ingerlateqqikkusukkamiuk Avannaata Kommunianut arsanik amerlasuunik tunissuteqarpoq.
- Arsap ataatsip meeqqat inuusuttuaqqallu nalunaaquttap akunnerpassuani nuannisartissinnaavai. Taamatullu qiimmattartitsiniarneq tassaavoq tunissutigerusutara, Avannaata Kommuniata tusagassiutinut nalunaarutaani Otto Motzfeldt oqarpoq, nangipporlu:
- Arsaq pinnguassatsialaavoq, ikinngutigiinnermik nukinnillu pilersitsisartoq. Ukiorpassuarni nammineq arsaattarsimavunga, Qallunaat Nunaanni, aammali Italiami, arsamik unammineq nuannersuujuaannarpoq.
Ajunngitsuliornermik ullorsiut tapersersorterpassualik
Avannaata Kommuniata borgmesteria, Palle Jerimiassen, tunissuteqarnermut qujavoq:
- Kommunimi aalarusuppugut. Taamaattumik nuannaarutigivara arsat amerlanerpaanut agguaanneqarnerat. Tunissummut angisuumut qujarusuppugut, qularutiginngilaralu nalunaaquttap akunnerpaassuini arsarnermut atorluarneqarumaartut ikinngutigiilersitsiumaartullu, Palle Jerimiassen oqarpoq.
Arsarpassit kommunimi illoqarfinnut nunaqarfinnullu agguaanneqarput.
Arsaqatigiiffinnut, atuarfinnut ulluuneranilu paaqqinnittarfinnut. Ilulissani ilaatigut fritidshjemmemut, utoqqaat peqatigiiffiannut Uvaasamut aamma timersoqatigiiffinnut I-69-imut Nagdlunguak ́-mullu.
Otto Motzfeldtip ukiut tamaasa ajunngitsuliornermut ullorsiusiortarpoq, taakkunanngalu sinneqartoortutit arsanut tunissutigineqartunut atorneqarput.
- Kalaallit Nunaanni suliffeqarfiit arlallit ullorsiutinut aningaasanik pinnatassanillu tunisisarput, taamaalillungalu tunniusseqqinnissanut periarfissittarlunga, oqarpoq.
Arsanik tunisineq Ilulissani ullumi ataasinngornermi nal. 11.30 pissaaq.
