ASK-ip oqoqarnera pissutigalugu aamma matuneqarallarpoq

Atuarfik Samuel Kleinschmidtimi atuartut ataasinngornermi klasseminnut atuariartussanngillat. Taamaattoq marlunngornermi ininut allanut atuartitsiviusussanut atuariartussasut, angajoqqaajusut ilisimatinneqarput. 

ASK-imi oqummik nassaartoqarnera pissutigalugu atuarfiup matuneqarnissaa Kommuneqarfik Sermersuup aalajangerpaa. Atuartut sulisullu peqqissusaat illersorniarlugu isumannaallisaalluni matusisoqarpoq.

Kommuni nittartakkamini taama nalunaarpoq.

- Pilertortumik akisussaassuseqartumillu iliuuseqarpugut. Meeqqat sulisullu peqqissusaat salliutinneqartuaannarput. Isumakululertoqarnera paasisinnaavarput, atuartitsinerilli unitsinneqaratik ingerlaannarnissaat anguniarlugu tamaviaarpugut, borgmester Avaaraq Olsen (IA) oqarpoq.

Atuartitsivissat inissinneqartut

Oquup nassaarineqartup qanoq annertutiginera pissutaalu paasiniarlugit, kommuni teknikkikkut sukumiisumik septembarip naalernerani misissuisitsivoq. Misissuisoqarnerata nalaani atuartut tamakkiisumik atuartinneqaannarsinnaaqqullugit atuartitsinerit ininut allanut nuunneqassapput.

Sermitsiap paasissutissaatai naapertorlugit atuartut ilaatigut illoqarfimmi suliffeqarfiit ilaanni atuartinneqassapput.

- Uani pisumi angajoqqaat sulisullu paasinninnissaat suleqataanissaallu kissaatigaarput. Ilimaginngisatsinnik pisoqarpoq, meeqqalli toqqissisimanartumiitinniarlugit suleqatigiippugut, borgmester Avaaraq Olsen nassuiaavoq.

Angajoqqaat sulisullu toqqaannartumik nalunaarfigineqarput, pisullu kommunip nittartagaani Facebookimilu quppernerani ingerlaavartumik paasissutissiissutigineqartassapput.

Atuarfik USK aamma septembarip 23-ani matuneqarpoq, atuarfimmi oqoqarneranik nassaartoqarnerata kingorna. USK-imi atuartut Nuussuarmi Qinngorpumilu atuareernerup kingorna ornittakkani maanna atuartinneqarput.