Assakaasut quaannaveeqqusikkat sumiiffinni arlalinni sivisunerusumik atorneqassasut politiit aalajangerpaat

Kalaallit Nunaata Politiivi tallimanngormat nalunaaruteqaraluarput 1. maj aallarnerfigalugu biilit assakaasui quaannaveeqqusersorsimanngitsunik taarserneqassasut. Illoqarfinnili arlalinni suli nittaattarpoq issinnerulertarlunilu, taamaattumillu assakaasut quaannaveeqqusersorsimasut sivisunerusumik atorneqarsinnaanerat politiit maanna nalunaarutigaat.

Politiit pigdækit atorneqarnerat nunami sumiiffinni arlalinni sivitsorpaat.

Foto: Tôrtia Reimer Johansen

KASSAALUK KRISTENSEN KASSAALUK KRISTENSEN Digitalimik aaqqissuisoq

Saqqummersinneqarpoq 30. Apriili 2025 - 15:00

Annonse

Kalaallit Nunaanni Politiit biilit assakaasuisa taarsernissaannut piumasaqaatertik nalilersoqqittariaqarsimavaat.

Sumiiffinni arlalinni silap allanngorarnera qerinnarneralu pissutigalugit, aalajangiunneqarpoq sumiiffinni arlalinni assakaasut quaannaveeqqusersorsimasut atornissaat sivitsorneqassasoq.

Sumiiffiit uku pineqarput:

Qeqqata Kommunia maajip arfineq-aappaat ilanngullugu.
Nuuk aamma Paamiut maajip 14-iat ilanngullugu.

- Aammattaaq inoqarfinni Nuup Paamiullu pigisaanni tamanna atuuppoq, Kalaallit Nunaanni Politiit Facebookiminni allapput.

Avannaata Kommuniani tamarmi aammalu Ittoqqortoormiini assakaasut quasattorsiutit atornissaannut immikkut akuersissut suli 14. maj 2025 ilanngullugu atuutissaaq.