ULLORMUT NALUNAARUT
Assakaasut ukiorsiutit atorneqarsinnaanerat sivitsorneqartoq - atuarfimmi tillinniartoqartoq
Nuummi maajip 21-ata tungaanut assakaasut ukiorsiutit atorneqarsinnaasut oqartussat nalunaarput.
Foto: Tôrtia Reimer Johansen
Sila pissutaalluni sumiiffinni arlalinni, ilaatigut illoqarfiit pingaarnersaanni, assakaasut ukiorsiutit atorneqarsinnaanerat sivitsorneqarpoq.
Nuummi biilit assakaasui aasarsiutinik taarserneqarnissaannut piffissaliussaq aqagu pingasunngornermi kingusinnerpaamik pisussaagaluarpoq, maannali sapaatit akunneranik ataatsimik kinguartinneqarluni maajip 21-anut nuunneqarpoq.
Kalaallit Nunaanni Politiit Facebookimi quppernerminni taamatut paasissutissiipput.
Biilit assakaasuisa taarserneqarnissaannut maajip 21-anit kingurtitsineq Paamiuni nunaqarfiinilu mikinerusuni kiisalu Kommune Qeqertalimmi aamma atuuppoq.
Avannaata Kommuniani biilit assakaasui ukiorsiutit maajip 31-ata tungaanut atorneqarsinnaanerat oqartussat immikkut akuersissutigaat.
Atuarfimmi tillinniartoqartoq
Nuummi atuarfimmi USK-imi marlunngornerup unnuaani tillinniartoqarsimasoq politiit pigaartuisa pisortaat Malik Olesen aamma ilisimatitsivoq.
Atuarfiup igalaava matualu aserorneqarsimasut politiit unnuami nalunaaqutaq marluk qaangilaaraa nalunaarfigineqarput.
Politiit sumiiffimmi misissuisut, maannamulli suut tillinneqarsimanersut suli ilisimaneqanngitsoq pigaartut pisortaat oqarpoq.
Atuarfik nutaaq Nuup qeqqaniittoq suli atulinngimmat USK atuarfittut suli atorneqarpoq.
