Timmisartumik angalasut pisinnaatitaaffii pillugit isumaqatigiinniarnerit EU-mi oqaluuserineqartaleqqipput.
Polenimi siulittaasoqarfiup EU-mi siulittaasoqarfimmit tamanna oqaluuserisassanut ilannguppaa.
Timmisartumik angalasut pisinnaatitaaffii pillugit isumaqatigiinniarnerit EU-mi oqaluuserineqartaleqqipput.
Polenimi siulittaasoqarfiup EU-mi siulittaasoqarfimmit tamanna oqaluuserisassanut ilannguppaa.
Tamatumunnga atatillugu danskit naalakkersuisuisa timmisartoq kinguaattoorpat taamaatinneqarpalluunniit sunik pisinnaatitaaffeqarnermut EU-mi malittarisassat arlallit allanngortinneqarnissaat sulissutiginiarpaat.
Angallannermut ministeri Thomas Danielsen (V) naalakkersuisut siunnersuutaat pillugu Folketingimi Europamut tunngasunut ataatsimiititaliami tallimanngornermi taperserneqarpoq.
Tamanna ilaatigut Kalaallit Nunaanni timmisartortitseqatigiiffinnut iluaqutaasumik malittarisassat allanngortinneqarnissaasa sulissutiginissaanut piginnaatitaaffilerneqarneranik isumaqarpoq.
EU-mi inatsisit Kalaallit Nunaannut suli pingaaruteqarput, naak Kalaallit Nunaat EU-mut ilaasortaanngikkaluartoq. Tamanna ilaasunut EU-mi nunani assersuutigalugu Danmarkimi angalanerminnik aallartitsisunut malittarisassat atuunnerannik pissuteqarpoq.
ILAASUT PILLUGIT EU-P MALERUAGASSAI NAATSUMIK
EU-p iluani imaluunniit avataani timmisartoruit, aamma nunap EU-miittup timmisartortitseqatigiiffianik EU-mut timmisartorussi, maleruagassat taakku atuupput.
Maleruagassat naapertorlugit nerisassanut unnuiffissanullu tunngatillugu pisinnaatitaaffeqarputit.
Aamma kinguaattoornersuaqarpat, timmisartuussinerit taamaatiinnarneqarpata imaluunniit timmisartut inniminnerneqarpallaarpata 600 eurot tikillugit taarsiiffigineqartoqarsinnaavoq.
Timmisartortitseqatigiiffilli „pissutsit immikkut ittut“, soorlu assersuutigalugu silarlunnera, pissutigalugit taamaatitsippat akiliiffigineqassanngilatit. Aamma timmisartortitseqatigiiffik piffissaq eqqorlugu taamaatitsippat.
EU-mi ilaasut pisinnaatitaaffii pillugit flypassager.dk-mi (qallunaatut tuluttullu) paasisaqarnerusinnaavutit.
Angalanerallu tamaat atuutissaaq, ministeri ataatsimiinnermi oqaluussisartup pingaarutilimmik erseqqissaavoq:
– Kalaallit Nunaanni timmisartuussinerit EU-mi aallartinneqarsimappata maleruagassat atuupput. Nunap immikkoortuani qanoq atuuttoqarsinnaanersoq EU-p eqqartuussiviata aalajangerpaa, taamaalilluni Kalaallit Nunaanni timmisartuussinermut maleruagassat atuussinnaalersillugit, taanna ilisimatitsivoq.
Aqqutissat pitsaasut qulakkeerneqassasut
Allatut oqaatigalugu: Københavnimiit Nuuk aqqusaarlugu Sisimiunut timmisartoruit, ilaaffimmi kingullermi kinguaattooruit imaluunniit timmisartuussinerit taamaatiinnarpat, EU-mi malittarisassat ilaatigut iluaqutigisinnaassavatit. Aamma Nuuk Sisimiulluunniit EU-miinngikkaluarpataluunniit.
Tamanna ilaasunut soorunami pitsaasuuvoq. Inuussutissarsiortunulli ajornartorsiutaassasoq Thomas Danielsen isumaqarpoq.
- Kalaallit Nunaanni silarluttarmat timmisartut taamaatiinnarneqartarlutillu kinguaattoortinneqarajupput, tamanna timmisartortitseqatigiiffinnut Kalaallit Nunaannut timmisartuussisunut aningaasatigut nanertuutaangaartarpoq, oqarpoq.
Taamaammat ministerip "EU-p Kalaallit Nunaatalu akornanni attaveqarluarnerup qulakkeerneqarnissaanik tamannalu tapersersorniarlugu malittarisassanik atuutilersitsisussamik" europamiut aaqqiissutissaannik suliniuteqarnissaminut Folketingimit tapersersorneqarpoq.
Kalaallit Nunaannut aaqqiissutissap saniatigut aamma EU-mi timmisartuussinermut malittarisassat nalinginnaasut qanoq ittuussanersut Danmarkimi naalakkersuisut soorunami kissaatigaat.
Ilaasut taarsiiffigitinneqarnissaannut kinguaattoorneq siunissami sivisunerusariaqartoq Danmarkimi naalakkersuisut EU-Kommissioni ilaatigut isumaqatigaat. Suliumajunnaarnerit ullumikkutulli aningaasanik kinguneqartitsisinnaajunnaartussaapput, malittarisassallu paasiuminarnerusariaqarput, ministeri isumaqarpoq.
Ikinnerussuteqartut akerliusut
Ikinnerussuteqartut akerliusut
Thomas Danielsen amerlanerussuteqartunit tapersersorneqaraluarluni ataatsimiititaliami partiinit arlalinnit akerlilersorneqarpoq. Danmarksdemokraterne, SF, Enhedslisten, Dansk Folkeparti aamma Radikale Venstre oqaluuserisassaq itigartitsissutigaat.
SF-ip tamanna atuisut pisinnaatitaaffiinik killilersuisussatut tunngavilersorpaa, Radikale Venstre-llu ministerip nammineerluni taarsiissuteqartarnissamik aaqqissuussineq akuerinnginnamiuk itigartippaa.
Maleruagassat paasiuminarnerujartornerat atuisartunut iluaqutaasoq Thomas Danielsenip erseqqissarpaa.
Aammattaaq kinguaattoornerup kingorna taarsiiffigitinnissamut piffissaritittap sivitsorneratigut ilaasut toqqaannanngitsumik iluaqutigiumaaraat isumaqarpoq, ministerimimmi oqarnera naapertorlugu kinguaattoornerit taamaatinneqarnerannit amerlanerusunik ingerlanneqassammata.
Kalaallit Nunaanni timmisartuussinerit pillugit apeqqut ministerip nammineq oqarnera eqqaassanngikkaanni ataatsimiititaliami oqaluuserineqarsimanngilaq.
