Assit takukkit: Amerikamiut timmisartui kingulliit Nuummiit aallartut

Timmisartoq Super Hercules, USA-p sakkutuuisa timmisartortartuisa timmisartuat, Nuummiit pingasunngornerup ullaavani aallarpoq. Politiit, tusagassiortut timmisartullu angallanneranni paasissutissiisarfimmik Flightradar24-mik atuisut timmisartup aallarnera malinnaavigaat.

Timmisartoq taanna aamma Kangerlussuarmiippoq, pingasunngornerullu ullaavani sivikitsumik Nuummut tikillatsiaqqilluni.

Timmisartut assartuutit marluk sapaatiummat maluginiarneqarluartut aappaaraat. Taakku Amerikamiut tikeraarnernissaat sioqqullugu nunatsinnukarput. Aappaa siulliulaarluni aallarpoq.

Amerikamiut tikeraarnissaat taamaatimmat timmisartut taakkualu usisaat biilit illersuusersukkat Nuummi Sisimiunilu atorfissaarupput. USA-p præsidentiata tullia J.D. Vance nulianilu Usha Vance Pituffimmut Space Basemut tikeraartussanngorput.

Timmisartoq Super Hercules Nuummi mittarfimmut nalunaaqutaq qulingiluanut pivoq, tunuanilu sakkutuut imarsiortut umiarsuaat alapernaarsuut Ejnar Mikkelsen takuneqarsinnaavoq.

Timmisartut herculesit taakku marluk sapaatiummat Camp Springsimiit Washington D.C.-p eqqaaniittumiit tikipput. Super Herculesili ingerlaannaq angerlamuukaassagunanngilaq. Nuummiit avannamut aallarpoq, Pituffiullu tungaanut imaq qulaallugu ingerlaarluni.