Assit takukkit: Politeeqarfik nutaaq atoqqaartinneqartoq
Politeeqarfik nutaarluinnaq Ilulissani atoqqaartinneqarpoq.
Ilulissani politeeqarfik nutaarluinnaq sapaatip-akunnerani matumani atoqqaartinneqarpoq, Iluliarmiullu Kalaallit Nunaanni politeeqarfimmik nutaajunerpaamik peqalernertik usorsisimaarutigisinnaanngorpaat.
Politeeqarfiup atulereerneraniit qaammat qaangiuttoq pisortatigoortumik atoqqaarfissiorneqarpoq. Atoqqaarfissiorneqarneralu malunnartinniarlugu kiffartuunneqartoq siulleq naasunnatsinneqarpoq.
Kalaallit Nunaanni Politiit tusagassiutinut taama nalunaaruteqarput.
Politeeqarfiit amerlanersaat iluarsaanneqarsinnaallutillu aserfallatsaaliorneqartariaqartut, Ilulissani nutaarluinnarmik sanasoqarnissaa pisariaqarsimasoq Politiit nalunaarput.
Suliniut naalagaaffiup politiivisa politikerinillu tapersersorneqareerluni, suliarlu sivisuumik ingerlareersorlu maanna piviusunngorpoq.
Pitsaasunik avatangiiseqarnissaq pingaaruteqartoq
Politeeqarfiit nutarternerisigut nutaanillu sanaartornerisigut Folketingi Kalaallit Nunaanni Politiit sulinerannut atugassarititaasut pitsanngorsarnissaannut aningaasanik immikkoortitsivoq. Sulinermi atugassarititat siornatigut isornartorsiorneqartareerput, soorlu atisaajartarfiit- anartarfiit- uffarfiit pitsaannginnerat taavalu silaannalunnera.
Politiit suliassaminnik naammassinninnissaannut avatangiisit pitsaasut pingaaruteqartut Politiit pisortaata Bjørn Tegner Bayip oqaatigaa:
- Suliffeqarfitsialak, avatangiisigissoq aammattaaq atortugissaartoq politiiusugut suliassavut tamakkerlugit naammassinissaanut ulloq unnuarlu pingaaruteqartorujussuuvoq. Taamaalilluta Kalaallit Nunaanni inuiaqatigiinneq annertunerusumik toqqissisimanerussasoq piviusunngortissinnaassavarput, politimesteri Bjørn Bay politeeqarfiup atoqqaartinneqarnerani oqalugiarnermini oqarpoq.
Allaaserisap assitaani politeeqarfik nutaaq takujuk.
