ESA ASTRONAUT MOGENSEN-IP NUNATSINNUT TIKERAARNERA
Ataasinngorpamiit Andreas Mogensen nunatsinni avataarsualerisitsissaaq
ESA-p avataarsualiartartuata Andreas Mogensenip nunatsinni tikeraarnerani pisussat ataasinngorpamiit aallartissapput. Avataarsuata nunatsinnut pingaaruteqarnera sammineqassaaq. Mogensenillu tikeraarnermini Kalaallit Nunaata erfalasua avataarsualiaannikuusani Nunatta Katersugaasivianut tunniutissavaa. Tamakku saniatigut aamma suliffeqarfiit, oqartussat, atuarfiit aamma ilinniarfiit sinniisai naapissavai, kiisalu kitaani nuna allanngutsaaliugassatut pilersaarutaasoq tunngavigalugu Sisimiuni Aasiannilu tikeraassamaarpoq.
Asseq: Ilinniartitaanermut Ilisimatusarnermullu Ministeriaqarfik
Ataasinngorneq juunip 17-iani, Nuummi innuttaasut avataarsuaminermik misigisaqarsinnaapput, ESA-p avataarsualiartartuata Andreas Mogensenip tikeraarnerani, taanna tikissamaarpoq avataarsuaninngaaniiunngitsoq kisianni Danmarkimiit.
Tassunga atatillugu ilinniartitaanermut aamma ilisimatusarnermut ministeriaqarfik Danmarkimiittoq internet aqqutigalugu malinnaanissamut qaaqqusivoq, taamaalilluni soqutiginnittut, pingaartumik Nuummi ullormi sammisaqarfiusumi pisuussanut malinnaasinnaallutik.
Ulloq sammisaqarfiusoq avataarsuanut tunngatinneqartoq
Kommuneqarfik Sermersuup borgmesteria Avaaraq Olsen aamma Kommuneqarfik Sermersuup Suliffeqarnermut Immikkoortortaqarfik suleqatigalugit DTU Space aamma Censec peqatigalugit suliffeqarfinnik aamma oqartussanik qaaqqusipput ullor,ut avataarsualerilluni sammisassaqarnissamut.
Aaqqissuussineq Hans Lynge Salimi Katuaq-mi Nuuk-mi pisussaavoq.
Ilisimatusarnermut ilinniartitaanermullu ministeriaqarfik Danmarkimiittoq ulloq sammisassaqarfimmi sammineqartussanut soqutiginnittuttunut malinnaasinnaanissaannut neqerooruteqarpoq. Ministeriaqarfiup nittartagaanut iserlutit nalunaarsinnaavutit MAANI.
Qaammataasat ullumikkut inuiaqatigiinni pingaaruteqarnerat sammineqassaaq, avataarsuaniit kiffartuussinerit amerlanerpaat ulluinnaanni pingaaruteqartumik inissisimammata, taamaattorli maannamut ikittuinnaat ilisimasaqarfigivaat avataarsuanit kiffartuussinernut attuumassuteqarnera.
Andreas Mogensen aammalu sinniisut allat arlalippassuit suliamut ilisimasaqartut qaammataasat pillugit saqqummiussissapput, qaammataasat aqqutigalugit kiffartuussinerit pillugit aammalu avataarsuani attaveqaasersuineq pillugu.
Ullormi sammisaqarfimmi peqataasut ilisimasaqarnerulernissaat anguniarlugu Kalaallit Nunaanni inuussutissarsiornermik ingerlataqartut avataarsuanit kiffartuunneqartarnerat pillugu samminnittoqassaaq. Tamatuma saniatigut Andreas Mogensen nammineq suliniutini Huginn-mik taasani pillugu saqqummiussissaaq. Ullorlu oqallitsitsinermik naggaserneqassaaq.
Erfalasorput Nunatta Katersugaasivianut tunniunneqassaaq
Ataasinngornerup unnukkuani Nal. 17.30-19.30 soqutiginnittunut tamanut ammasumik saqqummiussisoqassaaq. Tassani Andreas Mogensenip ilaatigut Erfalasorput avataarsuarmut nassarsimasani, Nunatta Katersugaasivianut tunniutissavaa.
Taamatuttaaq nunatsinniinnini iluatsillugu Andreas Mogensenip STEM fag-it (Science, Technology, Engineering, Mathematics – naturvidenskabsfag) pingaaruteqassusianik samminnissaaq aammalu atuarfinnik, Ilisimatusarfimmi, Pinngortitaleriffimmi, Asiaq-mi DTU-milu ilinniartunik Sisimiuneersunik naapitsissalluni, taamatuttaaq avataarsuani suliniutini pillugit saqqummiussissaaq kiisalu avataarsuanit kiffartuunneqarnerup qanoq pingaaruteqartigineranik oqaluttuassalluni. Ilinniartut atuartullu katillugit 1.000-it missaanniittut aggersarneqarsimapput.
Aamma Sisimiut Aasiaallu tikeraarneqassapput
Sapaatip akunnerata ingerlanerani aamma Andreas Mogensen aaqqissuussinerni sammisaqartitsinernilu assigiinnngitsuni peqataassaaq, ilaatigut WILD Nature Foundation peqatigalugu, taannalu Andreas Mogensenip sinniisuuffigaa.
WILD Nature Foundation Kommune Qeqertalimik Qeqqata Kommunialu suleqatigalugit periarfissanik misissuipput, nunap immikkoortuani nunamik allanngutsaaliukkamik pilersitsinissamut tunngatillugu.
WILD Nature Foundation peqatigalugu Andreas Mogensenip suliniut taanna tunngavigalugu Kangerlussuaq, Sisimiut, Aasiaat Qasigiannguillu tikeraassavai. Tassani innuttaasunik oqartussanillu naapitsissapput, nunap immikkoortuani nunaminertarujussuarmik allanngutsaaliukkamik pilersitsinissap pinngortitamut, silamut inuiaqatigiinnullu sunniutissaanik samminnittoqassalluni, taamak ilinniartitaanermut lisimatusarnermullu ministeriaqarfik nittartakkamini ilisimatitsivoq.
