Ataatsimiititaliami amerlanerussuteqartut aalisarnermut inatsisissaq tunuliaqutserpaat
Taamaalilluni Naalakkersuisut inatsisissatut siunnersuut oqallisigineqangaatsiaqisoq pilersaarutit malillugit naammassisussanngorpasippaat, tassa upernaaq manna ataatsimiinnermi. Kisianni ataatsimiititaliap allannguutissanik arlalinnik piumasaqarpoq aamma piumasaqarpoq pisortat ingerlatsiviat RG namminersorlutillu aalisarnermik inuussutissarsiuteqartut immikkut pineqassanngitsut. Maanna Naalakkersuisut ataatsimiititaliap inassuteqaataanut qisuariarnissaat tullinnguuppoq.
Inatsisartut aalisarnermut, piniarnermut nunalerinermullu ataatsimiititaliaat maanna isumaliutissiissumminik tunniussisimalereerpoq. Pissutissalimmik ilimagineqarsinnaalerpasippoq aalisarnermut inatsisissatut siunnersuut upernaaq manna pilersaarutigineqartutut naammassineqassasoq, naalakkersuisooqatigiimmi partiivi Inatsisartuni amerlanerussuteqarluartut akuersisussanngorpasimmata.
Toqqorsivimmit assilisaq: Leiff Josefsen
Amerlanerussuteqartut, tassa Inuit Ataqatigiit aamma Siumut sinnerlugit ataatsimiititaliami ilaasortat inatsisissatut siunnersuut ilusimisut iluseqarluni akuerineqassasoq inassutigigaluarlugu, taamaattoq Naalakkersuisunut kaammattuuteqarput allannguutissanik arlalinnik saqqummiusseqqullugit. Allannguutissatut naatsorsuutigineqartuni marluk tigussaasut tassaapput:
- Pisassaatinik atuisussaatitaaneq 85 procentimiit 75 procentimut appartinneqassasoq
- Nunamut tulaassuinermut pisussaatitaaneq 25 procentimiit 30 procentimut qaffanneqassasoq.
Royal Greenland immikkut ittumik pineqassanngilaq
Aalisarnermut, piniarnermut nunalerinermullu ataatsimiititaliap oqaluttuarisaanermi qaqinneqallattaartartoq kingumut qaqeqqippaa. "Ataatsimiitsitaliami amerlanerussuteqartut kaammattuutigaat Royal Greenlandip
nalimmassartinneqalernerani, najukkani aalisartut peqatigalugit tamakkiisumik imaluunniit
piginneqatigiinnikkut aaqqissuussisoqassasoq. (Isumaliutissiissutip qallunaatuuani namminersortunngorsaaneq ingerlatseqatigiissinnaanerluunniit Joint-venture taaneqarput).
Qaqugu qanorlu namminersortunngorsaanissaq imaluunniit allatut aaqqissuussinissaq pissanersoq ataatsimiititaliap isumaliutissiissutaani erseqqissaatigineqanngilaq. Kisianni RG-p immikkut inissisimanera pisussaaffeqarneralu tunngavigalugit immikkut pinnittoqarnissaa ataatsimiititaliamit ornigineqanngilaq, ataatsimiititaliarmi isumaqarpoq unammilleqatigiinnermi piumasaqaatit assigiissasut:
"Siunnersuummik suliarinnereernermini ataatsimiititaliaq isumaqarpoq ingerlatsisut
unammilleqatigiinnikkut assigiimmik atugassaqartinneqarnissaat pingaaruteqartoq.
Taamaattumillu pisassiissutit amerlassusaasa killissaat eqqarsaatigalugit siunissami
ikaarsaariarfeqartumik ingerlatseqatigiiffiit pisortanit pigineqartut namminersortullu
naligiissinneqarnissaat ataatsimiititaliamit piumasarineqarpoq."
EU-mut pisassiissutit aamma immikkut akuersissutinik periarfissaqartitsinissaq isorineqarput
Ataatsimiititaliap Naalakkersuisut nersualaarpai inatsisissatut siunnersuut aqqutigalugu naqissuserniarneqarmat aalisakkat pisuussutillu allat imartatsinniittut Kalaallit Nunaanni inuiaqatigiit pigisarigaat:
- Aalisakkat isumalluutit kalaallinit 100 %-imik pigineqarnissaasa qulakkeerneqarnissaanik
Naalakkersuisut kissaatigisaat ataatsimiititaliamit iluarisimaarneqarpoq. Tamanna
namminiilivinnissamut ingerlanermi alloriarnertut pingaarutilittut ataatsimiititaliamit
isigineqarpoq.
Taamaattorli ataatsimiititaliap maluginiarpaa ilaatigut nunap pisassaataanit EU-mut tunniunneqartartut. Nunap aalisagaqassutsisa Kalaallit Nunaata innuttaasuinut tutsinneqarnissaannik qulakkeerinninniarluni, ataatsimiititaliap Naalakkersuisut kaammattorpai EU-mut pisassiissutit Kalaallit aalisartuinut tunniunneqarnissaannik periarfissanik misissuisoqassasoq.
Ataatsimiitsitaliami amerlanerussutillit Naalakkersuisunut kaammattuutigaat, avataaniit
piginnittuusinnaanermut immikkut ittumik akuersisisinnaaneq allannguutissatut siunnersuuteqarnikkut peerneqassasoq. Taamaalilluni tamakkiisumik inatsisissatut
siunnersuutaasup ikaarsaariarfeqareernerani, nunatsinnit tamakkiisumik
piginnittuusussaanerup naqissuserneqarnissaa qulakkeerneqassammat.
Aqutsiveqarfik 47 pingasunngorlugu avinneqassaaq
Pisassiisarnerni aqutsiveqarfik 47 ataatsimut pisassiiffigineqartassasoq ataatsimiititaliaq
isumaqarpoq, pisassiissutinik tunniussineq aqutsiveqarfik 47 sumiiffittut ataatsimoortutut
isigalugu, annerpaamik pisassiissutit 2,5 %-tinut naatsorsorneqarlutik. Ataatsimiititaliaq
isumaqarportaaq, ulluinnarni aqutsinermi aqutsiveqarfik 47 pingasunut
aggulunneqarsimassasoq, tamannalu Naalakkersuisut nalunaarusiornermikkut
naammassisassagaat, isumaliutissiissummi ataatsimiititaliaq innersuussuteqarpoq.
Ataatsimiititaliap isumaqarpoq, siunnersuutip atuinerusinnaanermut pisussaaffik 85%-mik ukiumut pisassiissutinit annertussuseqarsinnaasoq aalisartunut artukkiisinnaasoq, silap pissusiisa allanngoriartornerat allallu pissutsit pissutigalugit, tamanna naammassineqarsinnaanngitsumik kinguneqarsinnaammat.
Tallimanngorneq maajip 10-ani inatsisissatut siunnersuut aappassaaneerneqassaaq. Aalisarnermut, piniarnermut nunalerinermullu ataatsimiititaliap isumaliutissiissutaa tamakkiisoq uani atuarsinnaavat.