Ataatsimiititaliami amerlanerussuteqartut: Uku akitsuutit peerneqassapput
Akitsuutinik arlalinnik atorunnaarsitsinissamik annikillisaanissamilluunniit Naalakkersuisut siunnersuutaat Aningaasaqarnermut Akileraartarnermullu Ataatsimiititaliami amerlanerussuteqartut taperserpaat, ataasiinnarli minillugu: Qummoroortartunut akitsuut affaannanngussanngilaq.
Aningaasaqarnermut Akileraartarnermullu Ataatsimiititaliami amerlanerussuteqartut, tassa IA aamma Siumut, qummoroortartut eqqussorneqarnerannut akitsuutit affaannanngortinneqarnissaannut akuersiumanngillat.
Leiff Josefsen
Aappaagu akitsuutit 26 millionit koruuninik ilanngaanneqarnissaat innuttaasut qilanaarisinnaavaat, tamannalu ulluinnarni nioqqutissat akitsoraluttuinnarneranni innuttaasut aningaasaqarnerannik oqilisaatitut isigineqassaaq.
Naalakkersuisut inatsisissatut siunnersuutaat Aningaasaqarnermut Akileraartarnermullu Ataatsimiititaliami amerlanerussuteqartut taperserpaat, tassani nioqqutissanut arlalinnut eqqussinermi akitsuutit appartinneqassallutik atorunnaarsinneqassallutilluunniit, taamaalilluni piffissami ulluinnarni nioqqutissat akitsoriartorfianni aningaasaqarnermik unammillernarfiusimasumi innuttaasut aningaasatigut periarfissaqarnerulersinneqassapput.
Takussutissaq
Akitsuutit uku atorunnaarsinneqassapput annikillisinneqassappulluunniit:
Sukkunut, sirupinut, glukosenut il.il. akitsuutit atorunnaarsinneqarput, kisianni ukioq 2024-muinnaq atuuttussatut. Inatsisissatut siunnersuutip atorunnaarsitsinissaq tamanna ataavartussanngortissavaa, taamaalillunilu akitsuutinit isertitat ukiumut 12,3 millionit koruunit missaannik ikilissapput.
Tipigissaatinut, pinnersaatinut eqqiluisaarnermut atortunut: Tassani akitsuut atorunnaarsinneqassaaq, 2024-milu 4 millionit koruuninik isertitsissasoq missingersuutigineqarpoq.
Sodavand: Akitsuutit nuna tamakkerlugu liiterimut 5 kr. 75 ørenik annertussuseqalersinneqassasut siunnersuutaavoq. Tamatuma kingunerisaanik Qaanaamut, Ittoqqortoormiinut Tasiilamullu eqqussuinermi immikkut akitsuusiineq maanna atuuttoq atorunnaartussaavoq, siunissami sodavandit il.il. Kalaallit Nunaannut eqqussuunneqaraangata tamarmik assigiimmik akitsuuserneqartalissammata. Akitsuutip appartinneqarnerata isertitassat ukiumut 10 millionit koruunit missaannik ikilisissagai missingerneqarsimavoq.
Qummoroortartunut akitsuut affaannanngortinneqassasoq Naalakkersuisunit aamma siunnersuutigineqarpoq, tamannalu nunap karsiata 1,5 millionit koruuninik isertitakinneruneranik kinguneqassagaluarpoq. Tamannarpiarli Aningaasaqarnermut Akileraartarnermullu Ataatsimiititaliap isumaliutissiissutaani taperserneqanngilaq.
Tusarniaaneq amigaataasoq
Siunnersuut tamanut tusarniaassutiginagu naalakkersuisoqarfinniinnaq tusarniaassutigineqarsimammat, ataatsimiititaliap aamma Naalakkersuisut isornartorsiorpai.
- Inatsisissatut siunnersuutit tamarmik saqqummiunneqarnissaat sioqqullugu tamanut tusarniutigineqartarnissaat Naalakkersuisunut ataatsimiititaliamit kaammattuutigineqassaaq. Tusarniaanermik ingerlatsisarnerit inatsisiliornermi ammanerusumik ingerlatsinissamik pilersitsiniarnermi pingaaruteqartuullutillu pisariaqartuusut, ataatsimiititaliaq isumaqarpoq. Tamatuma saniatigut tusarniaasarnerit inatsimmik piareersaalluni sulinerup pitsaassusissaanut siuarsaataasut ataatsimiititaliamit qularutigineqanngilaq, isumaliutissiissummini ataatsimiititaliaq allappoq.
Inatsisissatut siunnersuut sisamanngornermi maajip 23-ani aappassaaneerneqassaaq.
