Ataatsimiititaliaq: Qilalugartassiissutit Qaanaamut nuunneqarlik
Qaanaap eqqaani qilalukkat qernertat pisassiissutigineqartut tamakkerneqartut Naalakkersuisut qanittukkut nalunaarput, tamannalu Aalisarnermut, Piniarnermut Nunalerinermullu Ataatsimiititaliap qisuariarfigaa.
Qaanaami qernertanik qilalugartassiissutit tamakkerneqarput.
Assi: Verdensnaturfonden
Qaanaami piniartut isertitaqarsinnaanerat killeqartarpoq, qilalukkanillu qernertanik pisassiissutit nungunneqarmata pissutsit suli ajornerulertut Inatsisartut Aalisarnermut, Piniarnermut Nunalerinermullu Ataatsimiititaliaa allappoq.
- Qaanaap eqqaa
suli piniarfissagissorujussuuvoq isertitsissutaasinnaasunillu allanik isumalluutissaqarnani
massakkullu suli sikunngimmat aalisarnissamut periarfissaqarani, ataatsimiititaliami siulittaasoq Kristian Jeremiassen tusagassiutinut nalunaarummi allappoq.
Pisassiissutit agguataanerat nutaaq
Piniartut ikiorneqarnissaat anguniarlugu avannaani pisassiissutit agguataarneqarnerat allanngorteqqullugu ataatsimiititaliap Naalakkersuisunut siunnersuutigaa.
- Qaanaap avannarpasinnerpaartaani Etahmi 15-inik qilalugartassiisoqarneranut atatillugu
pisassiissutit taakku Qaanaamut nuunneqarnissaasa Naalakkersuisunut kaammattuutiginissaa
ataatsimiititaliamit kissaatigineqarpoq, Kristian Jeremiassen allappoq.
