ATAATSIMUT ISIGALUGU: Siumup qinersisartuni tigummiinnarpai, kommuninilu pingasuni annerpaanngorluni

Inatsisartunut qinersinermi Siumut qulinit ilaasortaqarsinnarluni sisamaannarnik ilaasoqalernerata kingorna, marlunngornermi kommunimut qinersinermi partii allaanerusumik angusarissaarluavippoq.

Nuna tamakkerlugu qinersinerit agguataarnerat tamaat qiviaraanni, Siumup taaguulluarneqartarnini aalajangiusimavaa, taamaalillunilu qinersisut 33,6 procentiinik qinerneqarluni, 2021-mi angusaq 35,5 procentiuvoq.

Akerlianik IA 2021-mi 36,9 procentinit 21,4 procentimut kinguariarujussuarpoq.

Demokraatit Inatsisartuni qinersinermi angusarissaarnertik uteqqippaat, kingullermillu qinersinermi 6,8 procentinit angusaqarsinnarlutik maanna qinersisartut 25 procentiinit taaguunneqarput.

Atassut Nalerarlu taamaaginnarput.

Kommunit ataasiakkaat

Kommuninut ataasiakkaanut ingerlaqqikkutta, Siumut kommunini pingasuni, immaqalu sisamani borgmesterinngortitsisinnaanissaminut siuttutut inissisimavoq, matumanili kommunalbestyrelsini ataasiakkaani isumaqatiginninniarnissat qanoq ingerlajumaarneri apeqqutaasut erseqqissaatigissavarput.

Avannaata Kommunia

Kommunit avannarlersaanni Siumut qinersisut 46 procentiinit 36 procentiinut 10 procentpointinik kinguariarpoq, partiili suli partiini annersaavoq.

Kingullermik qinersinermi Palle Jeremiassen aalassassimaarnerujussuup kingorna borgmesterinngorpoq, taamanikkut Siumumi ilaasortaajunnaarpoq, partiinilli allanit taperserneqarluni.

Palle Jeremiassen qinersinissaq sioqqutilaarlugu Demokraatinut ilaasortanngorpoq, p.artiilu kommunimi siuariarujussuarpoq, marlunngormallu 25, 7 procentinik taaguunneqarluni, 21-mi 9,5 procentinit taaguunneqarpoq.

Kommunalbestyrelsimi nutaami Atassut marlunnik ilaasortaatitaqalissaaq, Demokraatit sisamanik, IA ataatsimik, Naleraq pingasunik Siumullu arfineq marlunnik ilaasortaatitalissapput.

Kommune Qeqertalimmi IA qinersisartunit pillarneqarpoq 

Kommune Qeqertalimmi Siumut 25,7 procentinit 39,1 procentinut siuariarpoq, taamaalillunilu partii allla borgmesterinngortitsisussatut isikkoqarpoq. 

IA-meersaoq Ane Hansen qinigaaffimmi kingullermi kommunimi siuttuuvoq, partiili qinersisartunit pillarneqarpoq qinersisartullu 53,2 procentiinit 17,9 procentiinut kinguariarujussuarpoq.

Tulliuttuni takuneqarsinnaasutut Demokraatit 8,8 procentinit 26,4 procentinut siuariarput. Naleraq aamma siuariarpoq, Atassullu taamaaginnarpoq.

Pingasunngornerup ullaavani kommunimi qinigaasut agguataarnerat qinersineq.gl suli tamanut saqqummiunneqanngilaq, Sermitsialli paasisai naapertorlugit Siumut arfinilinnik ilaasortaatitaqalissaaq, Demokraatit sisamanik, IA pingasunik Atassut ataatsimik kiisalu Naleraq aamma ataatsimik ilaasortaatitaqalissaaq.

Malik Berthelsen Qeqqata Kommuniani angusarissaartoq 

Siumut Qeqqata Kommuniani borgmesteriutitaqareerpoq, Partii 39,8 procentinit 33,2 procentinut kinguariarpoq, partiili suli annersaavoq, kommunalbestyrelsinngortumilu arfinilinnik ilaasortaatitaqalerpoq.

Taamaalilluni maanna borgmesteriusoq qinigaaffimmi tullermi issiaqqissinnaasutut isikkoqarpoq.

Naleraq sisamanik ilaasortaatitaqalerpoq, Demokraatit pingasunik (naak marluinnarnik qinigassanngortitsigaluarlutik) Atassullu IA-lu tamarmik ataatsimik ilaasortaatitaqalissapput.

Kommuneqarfik Sermersooq

Illoqarfiit pingaarnersaata kommuniani IA-p 2009-mili borgmesteriutitaqartup annerpaanini attassinnaanera annertuumik pissanngataavoq.

IA 10 procentpointinik kinguariarpoq, ilaasortaatitaqarnikkullu Siumut IA-lu kommunalbestyrelsimi nutaami tamarmik arfineq marlunnik ilaasortaatitaqalerlutik amerlaqatigiipput.

IA-li Siumumit amerlanerulaartunik taaguunneqarpoq. Demokraatit 11,7 procentpointinik siuariarlutik sisamanik ilaasortaatitaqalerput, Nalerarlu ataatsimik ilaasortaatitaqalerluni, Atassut Qullerlu qinigaatitaqanngitsoorput.

Siumup borgmesterissatut sassartitaa Martha Abelsen 713-nit qinerneqarluni taaguunneqarnerpaajuvoq, maannamullu borgmesteriusoq Avaaraq S. Olsen 684-nit qinerneqarpoq. 

IA Kommune Kujallermi kinguariarujussuarpoq 

IA aamma kujataanit tuppallersaaserneqanngilaq.

Partii qinersinermi kingullermi borgmesterinngortitsivoq, marlunngormalli qinersisartunit pillarneqavissorluni, tassani partii qinersinermut kingullermut sanilliullugu affaannanngorpoq. IA 50,9 procentpointinit 22,1 procentpointinut appariarpoq.

2021-mi Demokraatit qinigassanngortitsinngilaat, marlunngormalli 38,9 procentinit taaguunneqarnermikkut angusaqarluarlutik partiini annersanngorput. Taamaalilluni partii kommunalbestyrelsimi amerlanerussusiisinnaaguni borgmesterinngortitsinissaminut periarfissaqarluarpoq.

Pingasunngornerup ullaavani kommunimi qinigaasut agguataarnerat qinersineq.gl suli tamanut saqqummiunneqanngilaq, Sermitsialli paasisai naapertorlugit Demokraatit arfineq marlunnik ilaasortaatitaqalissapput, IA pingasunik Siumullu tallimanik ilaasortaatitaqalissaaq.