Qinersineq INATSISARTUT 2025
Atassutip akileraarutit allanngortikkusuppai - "akileraarut manissoq" 30 procentinngortillugu
Atassut aalajangiisuussasuuppat, taava akileraarutit ilanngaatigineqartut tamarmik peerneqassapput aammalu innuttaasut isertitallit tamarmik 30 procentimik akileraaruteqartassapput sinneruttullu akissarsiat tigummisassallugit. Partii isumaqarpoq aaqqiissutit pisariusut innuttaasunut aningaasaqarnerulissutaanavianngitsut, tamatumalu qaavatigut piffissaq annertooq atorneqartartoq akileraarutit pillugit allaffissornikkut suliassat suliarineqartarnerannut.
Atassutip siulittaasua, Aqqalu Clasen Jerimiassen oqarpoq partiip akileraartarnermut siunnersuutaa qinersereernerup kingorna isumaqatigiinniutigissamaara.
Assiliisoq: Arnaq Nielsen
Nunat arlalissuit Sovjetunionimut siornatigut atassuteqarsimasut akileraartarnikkut aaqqissuussinermik, tassa "flat-tax"-imik, innuttaminnik akileraartitsisarput.
Taakkununnga ilaapput Estonia, Litauen, Letland, Serbien, Ukraine, Slovakiet, Georgien aamma Rumænien kiisalu Rusland nammineq. Tamatuma saniatigut akileraartarnermut aaqqissuussineq pineqartoq maanna Amerikami naalagaaffinni arlalinni atuutilersinneqarsimalereerpoq, assersuutigalugu Arizonami, Iowami, Mississippimi, Georgiami aamma Idahomi.
Atassut Inatsisartunut qinersinerup kingorna aalajangiisuusumik inississaguni, partiip taamatut aaqqissuussinermik atuutsitsisoqalernissaa Kalaallit Nunatsinni atuutilersikkusuppaa.
- Uagutsinnut pingaaruteqarpoq akileraartarnikkut aaqqissuussineq tamanut atoruminartoq pisariitsorlu nunatsinni atuutilersinniarnissaa, maannakkutut aaqqissuussaanitsinni, ilanngaaterpassuit naatsorsoruminaatsut pisariallillu atuukkunnaarsittariaqarparput, naggataatigut inuiaqatigiinnut tamarmut akisoorujussuanngortarmat, kisitsisinik ataasiakkaanik, soorlu inuttut ilanngaatinut, suliffeqarnermi ilanngaatitut, aamma sulinermi atukkanut ilanngaatit paasiniarlugit, Aqqalu Clasen Jerimiassen (A) oqarpoq nangillunilu:
- Aammalu nalilinnik peqartunut, nalilinnik ilanngaasiisarnermi aalajangersaaneq ajornakusooriartuinnavippoq. Tassa nunatsinni aqutsinermik oqimaatsumik atuutsitsivugut, isumaqarpugullu akileraartarnermut aaqqissuussineq taama ajornakusoortigisoq arlaannarpulluunniit ajugaanavianngitsoq, taamaattumik, aap, upperaarput akileraartarnermut aaqqissuussineq ataatsimut aaqqissuussisoq tamatta pisuunnguallannissatsinnik kinguneqassasoq, aammalu pisortat allaffissornerujussuat atorunnaarsinneqarpat sipaaruteqarsinnaalluartugut.
Akileraarut procenti ataaseq 100 millionit koruuninik naleqarpoq
Atassutip partiit allat peqataarusulersissagaluarpagit akileraariaaseq manittoq atuutilersinneqarluni, taava tamanna aamma isumaqarpoq aningaasartuutit 1 milliardit koruuninit amerlanerusut pilersussaasut.
- Mianersortumik piviusorsiortumillu periaaseqarluni naatsorsuinissaq pingaartipparput. Akileraarut 25 procentimut appartinneqarsinnaagaluarput, kisianni 30 procentimik siunnersuuteqarpugut, taamaalilluta procentit tallimat peqqinnissaqarfiup sullissineranut pituttorneqarsinnaaniassammata.
- Aammattaaq ukiumut naatsorsorneqartarpoq inuit naatsorsuutigineqartumik akileraarsimanersut, akileraarnerusimaguit imaluunniit akileraarnikippallaarsimaguit, iluarsinissaannut allaffissornermik annertoorujussuarmik pisariaqartitsivoq. Akileraartarnermut aaqqissuussineq manissoq atorlugu 30 procentimik akileraartarnissaq siunnersuutigaarput, qanorluunniit akissarsiatit 1 koruuniuppat imaluunniit 1 million koruuniuppata tamatta assigiimmik 30 procentimik akileraartalertussanngorluta.
Taamaattoqassappat 1 milliardit koruuninit amerlanerusut amigaatigineqalissapput, qanoq aningaasartuutit akilerneqassappat?
- Aaqqissuussineq atugarput annertoorujussuarmik allaffissornertaqarpoq, aaqqissuussinerlu siunnersuutigisarput iluatsissinnaassappat allaffissornikillisaasoqassaaq, taamaattumik annertuumik sipaarutaassaaq, tassa aqutsinermut aningaasartuutinut annikillisaataassasoq qularutiginngilluinnarparput.
Taava isumaqarpit aaqqissuussineq nutaaq nammineq imminut aningaasalersuinerussasoq?
- Aap!
Jerimiassen: Tamanna tamanut ajungaasunngortitsissaaq
Atassut isumaqarpoq taamatut akileraartarnermut aaqqissuussineq tamanut ajugaatitsinertut inissisimaffiussasoq, allaffissorluni aqutsinermut aaqqissuussinerit sipaarneqassapput, kisianni innuttaasunit aamma, Atassutip oqarnera naapertorlugu, akileraartarnermut aaqqissuussineq ajornannginnerulerlunilu paasiuminarnerulersinneqassaaq:
- Upperaarput akileraartarnermut aaqqissuussineq nalimmassarlugu ajornannginnerulersissasoq paasiuminarnerulersillugulu. Nammineq nalunaarsuisariaarutissaagut, ilanngaasersuinernillu pisarissersorunnaassaagut, tamarmik nalimmassarneqassapput, innuttaasutullu taamaallat 30 procentimik akileraaginnartalissaagut, aamma allaffissornikkut qutsinermut aningaasartuutinut qaffasissunut sipaartoqassaaq, taamaattumik tamakkiisumik isumaqarpugut tamanna tamanut ajugaatitsinertut inissisimaffiussasoq.
