Aternik saqqummiusseqqusinnginneq eqqartuussisuuneqarfiup aalajangiusimagaa
Aalakoorluni biilernermut allallu pillugit suliami qaqutigoortumi atinik saqqummiusseqqusinnginneq Sermitsiap atuukkunnaarnissaa piumasarigaluarpaa, iluatsinngitsumilli.
Tusagassiortut atinik saqqummiusseqqusinnginneq pillugu Nunatta Eqqartuussisuuneqarfia suliassanngortitsisinnaapput. Uanili suliami allannguinngilaq.
Assi: Morten Okkels
Arnap, ukiuni arlalinni Kalaallit Nunaanni qaffasissumik tatigineqartumik atorfeqartoq, aqqa saqqummiunneqassanngitsoq Nunatta Eqqartuussisuuneqarfiata marlunngornermi attatiinnarniarlugu aalajangiuppaa. Arnap atiata saqqummiuteqqusaannginnera Eqqartuussisoqarfik Sermersuumi sapaatip-akunnerata siuliani sisamanngornermi aalajangiunneqarpoq.
Unnerluussut naapertorlugu imigassartorsimalluni biilersimavoq biilertumillu allamik apuisimariarluni qimaariaraluarluni. Taakkununnga tamanut pisuunnginnerarpoq.
Arnap illersuisua atermi saqqummiusseqqusinani piumasaqarmat eqqartuussivik akuersivoq. Aalajangiineq Sermitsiap Nunatta Eqqartuussisuuneqarfianut suliareqqitassanngortippaa.
Atinik saqqummiusseqqusinnginneq atuutilersinneqaraangat unnerluutigineqartup atia paasissutissallu allat pineqartumik kinaassusersisitsisinnaasut saqqummiunneqarnissaat inerteqqutaalertarpoq. Suliaq qaqutigoortoq tamanit soqutigineqarpoq, taannalu pillugu allaaserinnissinnaanerput atermik saqqummiusseqqusinnginnerup akimmiffilersoraa isumaqarpugut. KNR aamma suliareqqitassanngortitseqataavoq.
Eqqartuussisoqafiup Sermersuumi naliliineq Nunatta Eqqartuussisuuneqarfiani eqqartuussisup isumaqatigalugu Sermitsiamut ilisimatitsissutigaa. Arnap inuiaqatigiinni immikkut inissisimaffia piliarisimasaanut unnerluunneqaatigisaanut attuumassuteqanngitsoq eqqartuussisup isiginiarpaa.
Taamaattumik atermik saqqummiusseqqusinnginneq suli atuutsinneqarpoq. Aamma inuit attaveqaqatigiittarfiatigut saqqummiussisoqaqqusaanngilaq. Suliaq qaqugu eqqartuussivimmi suliarineqassanersoq suli paasinngilarput.
