Atisaarniarfik nutaaq Sisimiuni ammartoq: Bolt Lamar illoqarfimmi atisalersoriaatsinik nutaalianik pilersitsivoq
Sisimiut illoqarfiata qeqqani nuannaarneq malunnartinneqarpoq atisaarniarfik nutaaq Alaska, Bolt Lamar, tallimanngornermi ullaap tungaani ammarmat. Nipilersorneq pisiniarfiup illoqarfimmi ilusianut tulluartoq, iikkat qernertut natermilu kuultit qillaalasut, pisiniartut illoqarfimmi pisiniarnermi misigisassanut nutaanut tikilluaqquneqarput.
Foto: Tôrtia Reimer-Johansen
Sisimiuni innuttaasut maanna Alaska, Bolt Lamarimukarsinnaalerput atisanillu nutaanik ullutsinnut naleqquttunik pisiniarsinnaalerput.
Sisimiut illoqarfiata qeqqani, Alaskamiippugut, pisiniarfimmi.
Foto: Tôrtia Reimer-Johansen
Sisimiut illoqarfiata qeqqani nuannaarneq malunnartorujussuuvoq. Atisaarniarfimmi nutaaq Alaska, Bolt Lamar, tallimanngornermi ullaap tungaani nalunaaqutaq qulinut ammaqqaarneqarpoq
Pisiniarfimmut iseraanni nipilersorpalaaq atisat ilusaanut tulluartuusoq tusaaneqarsinnaavoq. Iikkat tamaavimmik qernertumik qalipaateqarput, natermilu pinnersaatit qillaalasut kuultiusunillu takuneqarsinnaapput, pisiniarfiutillit pisiniat nutaat tikilluaqqunissaanut piareersimapput.
Foto: Tôrtia Reimer-Johansen
Pisiniarfik Arne Mogensenimit Mala Johnsenimiillu pigineqarpoq, Angajo Lennert-Sandgreenimiillu Sisimiunut nooqqammersumit aqunneqarluni. Taassuma aappani suleqatigissavaa.
- Sooruna Alaska?
- Sisimiut aputeqarfissuusarmat, minnerunngitsumillu maanimiut oqariartaaseq atorsimasaat Alaskaq (aliikkoq) eqqaanartillugu, Angajo Lennert-Sandgreen oqarpoq.
Foto: Tôrtia Reimer-Johansen
Pisiniarfittaaq februaarip ulluisa 14-anni ammaqqaarnissaa pilersaarutaagaluarpoq, timmisartulli kinguaattooqattaarnerat peqqutaalluni atortussat tikinnissaat utaqqeqqaartariaqarsimavaat. Pisiniarfittaaq sapaatip akunnera qaangiummat ammarpoq.
- Kassesystemi atugassarput utaqqeqqaaratsigu, silap peqqutaalluni kinguaattoornerit peqqutaallutik tikinnissaat kinguaqattaarami, Angajo Lennert-Sandgreen igalaat qillarissaatigalugit, Sermitsiamut oqaluttuarpoq.
Naak kinguaattoorsiugaluartoq silaannaq oqippoq:
- Qilanaaqaagut! Kiisami! Ammarnissatsinnut piareersimaqaagut.
Foto: Tôrtia Reimer-Johansen
Sineriammi ineriartorneq
Bolt Lamar Nuummi, Qaqortumi Ilulissanilu atisaarniarfiuteqarpoq. Maannakkullu Sisimiuni ammaapput.
- Sisimiuniittoqarmat atisanik atuinissaminnut tulluartunik. Inoqarpoq snescooterertartunik, aamma ilinniarfeqarfiuvoq inuusuttunik. Aatsaat aallartippugut, Angajoq Lennert-Sandgreen oqarpoq.
Hoodiesit, qarliit, tujuuluaqqat, kaskitsit, nasat, aaqqatit, qungasequtit allallu pisiassat pisiniarfimmi takussaapput. Pisiassallu sinnerit sapaatiuppat tikerassammata toqqagassaqarnerulissaaq.
Foto: Tôrtia Reimer-Johansen
Pisiniarfik ammalaaginnartorlu pisiniat isaalereerput, Angajo Lennert arnaannilu ulapaartussanngorput.