Atlantikup avannaaniit ilaasortat pingasut qallunaat ministeriat uppisinneqanngujoortoq taperseraat

Danmarkimi silap pissusia pillugu ministeri Lars Aagaard (M) politikkikkut tatineqartorujuuvoq, marlunngornermilu ualikkut allamik pisoqarpoq.

Innaallagissap aqqutaanik alliliinerup kinguaattoornera pillugu paasissutissiisoqannginneranik suliami, danskit naalakkersuisui aamma silap pissusia pillugu ministeri Lars Aagaard, Atlantikup avannaaneersut ilaasortat pingasut tapersersuillutik nalunaarutigaat.

Aaja Chemnitz (IA), Anna Falkenberg (SP) aamma Sjúrður Skaale (JF) tapersersuisuupput.

Folketingimi ilaasortat pingasut Kalaallit Nunaanneersut Savalimmiuneersullu Ritzauimut allakkatigut qanoq isumaqarnerlutik paasissutissiipput.

- Ministerip Folketingimi ilaasortanut maannamiit peqataatitsiuartarnissaa paasissutissiiuaannarnissaalu qularinngilarput. Tamanna pissutigalugu ministeri naalakkersuisullu tamaasa taperserpagut.

Paasissutissiisimannginnera isornartorsiorneqartoq

Politikerit pingasut taakkua Lars Aageardip kinguaattoornerit pillugit paasissutissiisimannginnera isornartoq erseqqissarpaat.

Mingutsitsinnginnerusumik nukissiuuteqalernissamik kinguaattoorneq pillugu Folketingimut paasissutissiisoqarsimannginnera ajuusaarnarpoq, allapput.

- Folketingimi partiit ataavartumik paasissutissinneqartarnissaat tatiginninnermut sulinermullu pingaaruteqarpoq, allapput.

Ministerilli utoqqatsersimanera paasissutissiissimannginnerullu ajornartorsiutaanera nassuierutigisimagaa taakku aamma isiginiarpaat.

Atlantikup avannaaneersut ilaasortat sisamaapput.

Aki-Matilda isumminngitsoq

Sisamaat Naleqqameersoq Aki-Matilda Høegh-Dam suli isummersimanngilaq, ministerimilli uppititsinissap akuliuffiginissaa suliassarinagu DR-imut marlunngornermi ualikkut oqarpoq.

Danmarkimi politikikkut aporaattoqarnerani Ilaasortat nunat avannarlerneersut toqqaannartumik akuliuttarnerat qaqutigoortorujussuuvoq.

Taamaattumik pisoq "uissuumminartoq“ politikkikkut oqaaseqartartoq Noa Redington, Helle Thorning Schmidtimut siunnersortaasimasoq, oqarpoq.

- Lars Aagaardimut tunngatillugu ilimagineqanngitsut pipput, naalakkersuisullu Lars Aagaardi piumasaarsortiinnarunnanngikkaat paasinarsivoq. Tamanna naalakkersuisunut ministerimik uppititsinnginnissamik aalajangiusimanninnermut uppernarsaataavoq, oqarpoq.

Naalakkersuisut ilaasortamik allamik tapersertissaqarpat?

Danmarkimi naalakkersuisut ikinnerussuteqartuupput, taamaattumik Lars Aagaard ministeritut uppitinneqassappat amerlanerussuteqartut aalajangissavaat.

Naalakkersuisut 85-inik tunuliaqutaqarput, Atlantikullu Avannaaneersut pingasut ilanngukkaanni 88-inik tunuliaqutserneqarlutik.

Taamaattumik naalakkersuisut qulakkeerneqassappata amerlanerussuteqalersitsisussamik taperserniarneqartariqarpoq.

Attaviitsut Jon Stephensen, Mike Fonseca, Theresa Scavenius, Jeppe Søe imaluunniit Atlantikup avannaaniit Aki-Matilda Høegh-Dam taamaaliorsinnaapput.

Amerlanerussuteqassagaanni 90-it tapersiisaraluarput, Peter Seier Christensenilli Folketingimi ilaasortaanerminit sivitsortumik sulinngiffeqarnera pissutaalluni taasinissaa ilimananngimmat, 89-init taperserneqarnissaq pisariqarpoq. Taamaalillunilu naligiimmik taasisoqarnissaralua pinngitsoortinneqassalluni.

/ritzau/