Atorfilittaasimasut pinngitsuunerartut

Lars-Emil Johansenip aamma Lars Møller-Sørensenip eqqartuunneqarnerat Eqqartuussisoqarfik Sermersuumi ataasinngornermi nalunaaqutaq 13.00 aallartippoq.

Eqqartuussineq nalunaaqutaq qulingiluanut aallartittussaagaluarpoq, Lars Møller-Sørensenilli eqqartuussissuserisua kingusinaarmat kinguartinneqarpoq.

Suliami Stine Dana Lynge eqqartuussisuuvoq, eqqartuussinerlu unnerluussutip atuarneqarneranik aallartinneqarpoq.

Taakku marluk peqquserluttuliorsimasutut oqartussaassutsimillu atornerluisimasutut unnerluutigineqarput, unnerluutigineqartullu taakku marluk nassuiaateqarfigisussaallugu.

Lars Møller-Sørensenip illersuisuata sullitani pineqartunut marlunnut pinngitsuutinneqarnissani kissaatigaa.

Lars-Emil Johansen aamma pinngitsuunerarpoq, tassa tamanut pinngitsuutinneqarnissani kissaatigaa.

Unnerluussisoq saqqummiisoq

Taakku pinngitsuunerareermata unnerluussisup suliaq saqqummiuppaa.

Suliamut allamut atatillugu suliaq politiinit aallartinneqartoq paasissutissiissuutigineqarpoq, tassani sulisuusimasup Lars-Emil Johansen sulinani kommunimit aningaasanik tunineqarsimasoq oqaluttuatimmagu.

Kommunip Lars-Emil Johansenillu isumaqatigiissutaanni atorfiup qanoq ittuunera erseqqissumik nassuianeqarsimanngitsoq unnerluussisup maluginiarpaa. Aamma akissarsiat qaffanneqarnerannut tunngavilersuutinik allassimasoqannginnera piffissallu atorneqartussap eqqaaneqannginnera.

Siunnersortitut ajunngitsorsiassat akiligassaq aqqutigalugu akilerneqartarfimanngillat, naak taamaattoqartassasoq isumaqatigiissummi allaqqagaluartoq. Angalanerit kommunimit akilerneqartussaagaluartut angalanerit pillugit allattuinerit aamma amigaataasut unnerluussisussaatitaasoq oqarpoq.

Illersuisoq: Lars-Emil avataanit siunnersortitut sulisimavoq

Unnerluussisoq eqikkaalluni saqqummeereermat illersuisut oqaaseqartussanngorput.

Naalakkersuisunut siulittaasuusimasoq kommunimi atorfeqarsimanngitsoq avataaniillu siunnersortitut sulisimasoq Lars-Emil Johansenip illersuisuata Ulrik Blidorf oqaatigaa.

Lars Møller-Sørensen: Lars-Emil Tasiilami suliniummi ikiuuttussaasimasoq

Lars-Emil Johansen pillugu oqaaseqartoqareermat Lars Møller-Sørensenip killisiorneqarnera aallartippoq, tassanngaanniit tigulaarissaagut:

Unnerluussisoq: Lars-Emil Johansenimut qanoq attuumassuteqarpit?

Lars Møller-Sørensen: - Kinaanersoq kikkut tamarmik nalunngilaat, kisianni attuumassuteqarfiginikuunngilara. Ikinngutigiinngilagut.

Unnerluussisoq: Qanoq ililluni isumaqatigiissut pilersinneqarpa?

Lars Møller-Sørensen: - Tasiilami Kofoeds Skolemik pilersitsinissaq kissaatigineqarpoq. Qanoq piviusunngotinneqassanersoq allaffeqarfimmi eqqarsaatersuutigineqarpoq ...

- Atorfik inuttassarsiuunneqanngilaq, tamannalu aamma nalinginnaanngilaq, atorfimmi inuttalerneqartussaq pineqanngimmat.

Unnerluussisoq: Lars-Emil Johansen attaveqarfigisimaviuk?

Lars Møller-Sørensen: - Eqqaamanngilara. Immaqaluunniit taanna uannut saaffiginnittuusinnaavoq.

Unnerluussisoq: Sooq Lars Emil Johansen?

Lars Møller-Sørensen: - Lars Emil-Johansen misilittagartuujullunilu attaveqaateqarluartoq qularineqarsinnaanngilaq. Ilaatigut imigassamik ajornartorsiuteqartunut katsorsaariaatsinik nalunngisaqarluni, tamanna Tasiilami suliniummut tunngatillugu atuuppoq, tassani imigassaq ajornartorsiutaangaatsiarmat. Eqqaamanngilara kia siunnersuutigineraa.