Attaveerunneq annertooq Tusassip ajuusaarutigaa
Nunatsinni qaammataasakkut attavillit nal. 9:40 - 12:15 akornanni attaveeruteqqasimapput. Attaveerunneq Tusassip ajuusaarutigaa, pisiortorfiannilu kukkusoortoqarsimanerani qaammataasakkut attaviit tamarmik eqqorneqarsimanerat tusagassiuutinut nalunaarummi erseqqissaatigalugu.
Sisamanngormat Tusassip pisiortorfiannit kukkuneq peqqutaalluni sumiiffinni arlalinni akunnerit arlallit attaveeruttoqarpoq.
Tasiilami pitsanngorsaanermut atatillugu kukkuneq pisimavoq, atuisullu suli attavinnut naammagisimaarinninnginneq misigaat, tusagassiuutinut nalunaarummi Tusass allappoq.
Ingerlatsinermut pisortaq Jonas Hasselriis oqaaseqarpoq:
- Kukkuneq ajuusaarnaqaaq pinngitsoorneqarsinnaasimagaluarlunilu. Qaamataasakkut attavilinni atuisuvut kukkunermit eqqugaasimammata ajuusaarutigaarput. Pisiortorfipput massakkut attaveqarfigaarput, taamatut kukkusoqaqqinnginnissaa qulakkeerniarlugu, pisortaq oqarpoq.
Tasiilami ilimagisamit unammillernartut annertunerusut
Kukkuneq massakkut iluarsineqareersimavoq, kisiannili aaqqiineq naammassiniarlugu tallimanngornermi maaji 24-ani nal. 06.00-07.00 akornanni minutsit qulit missaanni Tusass attaveerutsitsisariaqarsimavoq, Tusass allappoq.
Tusass naapertorlugu Tasiilami attaviit pillugit unammillernartut allat allanit tunngaveqarput, Tasiilami piffissaq sivisooq internetimik atuisunut attaviit naammaginanngitsumik allanngorarsimammata.
- Tamanna kusananngitsuusoq nassuerutigiinnassavarput. Nuna tamakkerlugu attaviit pitsanngorsarnissaat sulissutigiuaannarparput, unammillernartorli una ilimagisamit anneruvoq pisariunerullunilu. Immikkut ilisimasortavut suleqativullu tamarmik aaqqiissummut tassunga attuumassutillit aaqqiiniarnermut peqataapput, Jonas Hasselriis oqarpoq.
