Attaveqaatit isumannaarnissaanut iliuuseq nutaaq
– Atlantikup avannaani immap naqqatigut kabeli maluginiutilik Danmarkimi illersornissamut isumaqatigiissummut ilaasussaq sulissutigaarput, Tusassimi pisortaq oqarpoq.
Marsip aallaqqaataanilli Tusassip pisortarisaa Toke Binzer: – Atlantikup avannaani immap naqqatigut kabeli maluginiutilik atorlugu illersornissaqarfiup immap naqqa nakkutigisinnaavaa, uagullu siunissami digitalimik attaveqaasersuutitsinnik qulakkeerinnissinnaavugut.
Assiliisoq: Tusass
Nunatta isumannaatsuunissaa uagutsinnut pingaarnerpaajuvoq, Tusassip pisortaa Toke Binzer oqarpoq, Namminersorlutik Oqartussallu peqatigalugit Atlantikup Avannaani imaatigut kabeli nutaaq maluginiutilik Illersornissamut isumaqatigiissut aqqutigalugu aningaasalersorniarlugu sulissutigineqartoq ilisimatitsilluni. Tamanna nunani tamani attaveqarnerup qulakkeerneqarnissaanik suliniutit nutaat ilagaat.
– Kitaata sineriaani immap naqqatigut kabelimik ikkussuinissamut EU-mit aningaasaliisoqarnissaa aamma pisariaqartipparput, nangilluni oqarpoq.
Qanoq akeqarpa?
– Atlantikup avannaani immap naqqatigut kabeli maluginiutilik milliardilikkaanik aningaasaliiffigineqassasoq pisariaqarluinnarpoq, taamaattumik illersornissamut isumaqatigiissummi pingaarnersiorneqarnissaa pisariaqartilluinnarparput. Namminersorlutik Oqartussanit, Tusassimit inuiaqatigiinnillu allanit aningaasartuutit illikartinneqarnissaat isumaqatiginninniarnerni pingaarnertut siunertaavoq, taamaalilluni aningaasartuutit taakku inuit inuussutissarsiortullu internetimut oqarasuaatinullu akiliutaannut ilanngunneqannginniassammata.
Tamanut iluaqutaassasoq
Tusass isumaqatiginninniarnermi nukittuumik inissisimaniarluni Namminersorlutik Oqartussanik pitsaasumik anguniagaqarfiusumillu oqaloqateqartartoq, Toke Binzer ilisimatitsivoq.
– Atlantikup avannaani immap naqqatigut kabeli maluginiutilik atorlugu illersornissaqarfiup immap naqqa nakkutigisinnaavaa, uagullu siunissami digitalimik attaveqaasersuutitsinnik qulakkeerinnissinnaavugut. Tamanut iluaqutaassaaq, Toke Binzer tikkuaavoq.
Sooq illersornissamut isumaqatigiissummut ilaasariaqarpa?
– Issittumi isumannaallisaanissaq illersornissamut isumaqatigiissummi pingaarnerit ilagaat, ilaatigut immap qaavanik naqqanillu nakkutilliisinnaaneq. Atlantikup avannaani immap naqqatigut kabeli maluginiutilik suliassamut tamatumunnga atorneqarsinnaavoq, tamannali annertuumik aningaasaliiffigineqartariaqarpoq, naggataatigullu politikkikkut aalajangiiffigineqartussaalluni. Tamanna „marloqiusamik atuuffeqassaaq“, taamaalillunilu illersornissamut inuiaqatigiinnullu sunniuteqassalluni, taanna oqarpoq.
Tamatumunnga tunngatillugu attaveqaasersuutit pingaarutillit isumannaarnissaannut Tusass akisussaasuusoq, Toke Binzer oqarpoq.
– Tamannali Namminersorlutik Oqartussat Illersornissaqarfillu suleqatigilluartinnagit angusinnaanngilarput, oqarpoq sammisarlu pillugu siunnersueqatigiinnissaq pillugu Tusassip Center for Cybersikkerhed oqaloqatigiuartaraa ilisimatitsilluni.
Siunissami attaveqaasersuutit
Imaatigut kabelit kipippata qanoq periuseqartoqassava?
- 2019-imi kabelip imaatigut attaviup arlaleriarluni kipineqarneratut pisoqaqqillaqunanngeqaaq. Eqqugaariaannaanitsinnik taakkua takutitsipput.
– Atlantikup avannaani immap naqqatigut kabelimut, kitaata sineriaani immap naqqatigut kabelimut ilassummut qaamataasunullu attaveqaatinut Namminersorlutik Oqartussat peqatigalugit aningaasaliissuteqarsinnaagutta, attaveqaatit ilaat ajoquteqassagaluarpat eqqugaariaannaannginnerujussuussaagut. Aningaasaliinissaq qulakkeerneqarpat, 2019-imi immap naqqatigut kabelip ajoqusernerata nunamut tamarmut sunniuteqangaarneratulli pisimasutut ittut siunissami pinngitsoortilluinnarsinnaavavut, Toke Binzer oqarpoq.
Immap naqqatigut kabelit, qaammataasatigut attaveqaatit, radiokkut attaveqaatit, fibernet oqarasuaatitigullu angallattakkatigut attaveqaatit atorlugit inuiaqatigiit atassuteqarnerat Tusassip pingaarnertut suliassarigaa, taanna erseqqissaavoq.
– Tamatuma saniatigut siunissami attaveqaasersuutit isumannaarnissaat sulissutigaarput, nangilluni oqarpoq.
Aningaasaliissutigineqartut annersaasa ilagaat radiokkut attaveqaatit pitsanngorsarneqarnerat, qarasaasianut atortorissaarutaasivittaaq qaammataasatigullu attaveqaatit.
