Atuartut ilinniartullu ajornannginnerusumik allassinnaalerlutillu atuarsinnaanngorput
Atuarfeqarfiit atuartunut allannermik atuarnermillu ajornartorsiutilinnut iluaqutaasussamik akeqanngitsumik atortorissaaruteqalerput.
IntoWords sakkuuvoq digitaliusoq ilaatigut allannermi allatat atuffassissutigisinnaallugit oqaatsinillu siunnersuuteqartarluni, allannermut ikiuut ordbogertalik piginnaasaraa, atuisullu ataasiakkaat pisariaqartitaannut tulluarsarsinnaalluni.
Assi: Uddannelsesstyrelsen
Atuartut ilinniartullu septembarip aallaqqaataaniit IntoWordsimut akeqanngitsumik isersinnaalerput.
Ilinniartitaanermut Aqutsisoqarfimmit Vitec MV-mut isumaqatigiissuteqartoqarnerani tamanna periarfissaalerpoq.
Ilinniartitaanermut Aqutsisoqarfik tusagassiutinut taama nalunaaruteqarpoq.
IntoWords sakkuuvoq digitaaliusoq, inunnut naqinnernik ilisarsisinnaanngitsunut imaluunniit allatigut atuarniarnerminnik ajornartorsiuteqartunut oqaatsini arlaqartuni, ilaatigut qallunaat tuluillu oqaasiini, ikorfartuutaasoq.
Isumaqatigiissut atuartitsinermi naligiinnerusumik atugassaqartitsinissamut ikaarsaariarneruvoq pingaaruteqartoq – aammattaaq sakkuuvoq inuit amerlasuut naqinnernik ilisarsisinnaanngitsutut naqissuserneqarsimanngikkaluartut iluaqutigisinnaasaat.
Kalaallisut ilanngunneqassaaq
IntoWords aallaqqaataaniilli oqaatsini soorlu qallunaat tuluillu oqaasiini, sakkugineqarsinnaasunik tamanik atortulersugaareersoq atulerneqarsinnaajumaarpoq. Tamatumunnga peqatigitillugu kalaallit oqaasiisa programmimut ilanngunneqarnissaannut ineriartortitsilluni sulineq aallartinneqassaaq.
Tassa allassimasunik nipinngortitsisarneq kalaallisoortoq Martha, kalaallit oqaasiinut siunnersuutit oqaatsillu teknologiivinik allanik ineriartortitsisoqassaaq.
IntoWords ilaatigut allannermi allatat atuffassissutigisinnaavai oqaatsinillu siunnersuuteqartarluni, allannermut ikiuut ordbogertalik piginnaasaraa, atuisullu ataasiakkaat pisariaqartitaannut tulluarsarsinnaalluni.
Atuartitsisunut immikkullu ilinniagalinnut programmimik atuinermik pikkorissartitsinissaq ukiap ingerlanerani neqeroorutigineqassaaq. Pikkorissartitsinerit Nuummi, Ilulissani, Aasianni, Sisimiuni Qaqortumilu ingerlanneqassapput.
Atuarfiit arlaqartut IntoWords-imik atuisooreerput. Taakkua suli isersinnaassapput, taamaattorli siunissami namminneerlutik akiliuteqartassanngillat, Ilinniartitaanermut Aqutsisoqarfiup aningaasartuutit tamaasa matusussaammagit.
