Atuisut imeruersaatit Danmarkimeersut puukuinik akiliisarunnaassapput
Kalaallit Nunaanni pisiniarfiit atuisullu imeruersaatit Danmarkimeersut puukuinik utertitsinissamut nalunaaqutsersimasunik pisigaangamik Danmarkimut Nunatsinnullu puukunik utertitsinissamut qularnaveeqqutinik tamanik akiliisarunnaassapput.
Foto: Tôrtia Reimer-Johansen
Danskit imeruersaatit puukuinik utertitsinissamik qularnaveeqqummik akiliisarnerup malittarisassaasa allanngortinneqarnerisa kingorna Nunatsinni atuisut sipaaruteqarsinnaalersippaat.
Kalaallit niuertarfiutaat Danmarkimit imeruersaatinik pisigaangamik qallunaanut kalaallinullu imeruersaatit puukuisa utertinneqarnissaannut qularnaveeqqummik maannamut akiliisaraluarput.
Nalunaarutip allanngortinneqarnerata kingorna danskit suliffeqarfiutaat Kalaallit Nunaannut nioqquteqarsimanertik uppernarsarsinnaagunikku Dansk Retursystemimut utertoorutissanik noqqaassuteqarsinnaalissapput.
- Taamaalillutik Nunatsinni pisiniarfiit atuisullu puukut utertitassat qularnaveeqqutaannik Danmarkimut akiliuteqartsinneqartarunnaassapput, Naalakkersuisut tusagassiorfinnut nalunaarummi allapput.
Malittarisassat allanngortinneqarnerat Naalakkersuisut suleqatigalugit suliarineqarsimasoq Danmarkimi avatangiisinut ministeri Magnus Heunicke oqarpoq, avatangiisinullu naalakkersuisup Bentiaraq Ottosenip (A) aaqqiissutissamik nassaartoqarnera nuannaarutigaa:
- Nunatsinni namminerisamik utertitsisarnermut aaqqissuussineq 1. januar 2024-mi ingerlanneqalerpoq, Danmarkimi avatangiisinut ministeri suleqatigalugu aaqqiissuteqarnerput nuannaarutigaara, taamaalilluta suli imeruersaatit Danmarkimit eqqussisinnaavugut, kisianni puukut utertitassat qularnaveeqqutaannik Danmarkimut akiliisariaqarunnaarluta, oqarpoq.
