Avannaata Kommunia ammaannartumik ikuallaasarnissamut immikkut ittumik akuerineqartoq
Avannaata Kommunia eqqakkanik ammaannartumik ikuallaasinnaanera Naalakkersuisut immikkut ittumik akuersissutigaat. Kommuni ESANI-mi peqataanngilaq, siunissarli ungasinnerusumut eqqakkanut tunngatillugu aaqqissuussamik avannaani kommunimut tulluarsakkamik suliaqarluni.
Namminersorlutik Oqartussat
Naalakkersuisut aalajangerput, Avannaata Kommunianut kommunimi illoqarfinni nunaqarfinnilu 24-ni ammaannartumik ikuallaasarnissamut immikkut ittumik akuersissuteqarniarlutik. Immikkut ittumik akuersissuteqarnermut kommunip siunissamut ungasissumut eqqagassalerinermut pilersaarusiorluni ingerlallualersimanera peqqutaavoq.
Namminersorlutik Oqartussat tusagassiutinut nalunaaruteqarnerminni tamanna paasissutissiissutigaat.
- Naalakkersuisuniit eqqagassalerinermut suliassaqarfik pingaartinneqarpoq. Eqqagassalerineq kommunip isumagisassaraa. Tamatumunnga atatillugu kommunit tamaasa eqqagassalerinermi unammilligaat tusarniaaffigalugit tikeraarpakka. Kommunit tamarmik ilisimatinneqarput, ukiuni 2024-2025-mi kommunit tamarmik immikkut eqqagassalerinermik pitsanngorsaanissamut tapiiffiginiarlugit 3 mio. koruunit tikillugit tunineqarsinnaasut.
- Qaammat kingulleq nuna tamakkerlugu eqqagassalerinermi ataatsimut aaqqiissutissani ikuallaavik siulleq atulerpoq. Ikuallaaviit eqqagassalerinitta annertoorsuarmik pitsaanerulernissaanut, taamaalilluni ammaannartumik ikuallaasarnerit pisariaarunnissaannut qulakkeerisussaapput. Ammaannartumik ikuallaasarnerit peqqissutsimut avatangiisinullu annilaanganartortaqarput, Avatangiisinut Naalakkersuisoq Kalistat Lund (IA) tusagassiutinut nalunaarummi paasissutissiivoq.
Qaammatini pingasuni akuerineqartoq
Eqqagassanik ikuallassinnaasunik ikuallaasarneq ikuallaavinni avatangiisinut akuerisani ingerlanneqassaaq.
Naalakkersuisulli nalunaarutigaat eqqakkanik ammaannartumik ikuallaasinnaanermut akuersissutigineqartoq sivisunerpaamik qaammatini pingasuni atuutissasoq.
Sumiiffinni ukunani ammaannartumik ikuallaasarnissamut immikkut ittumik akuersissutaagallartumik nalunaaruteqartoqarpoq:
- Qaanaaq nunaqarfiillu Qeqertat, Savissivik aamma Siorapaluk.
- Upernavik nunaqarfiillu Naajaat, Tasiusaq, Upernavik Kujalleq, Aappilattoq, Innaarsuit, Kangersuatsiaq, Kullorsuaq, Nutaarmiut aamma Nuussuaq.
- Uummannaq nunaqarfiillu Ikerasak, Niaqornat, Qaarsut, Ukkusissat aamma Saattut.
- Ilulissat nunaqarfii Oqaatsut, Qeqertaq, Saqqaq, aammalu Ilimanami anartarfiit puussiartaat imaqanngitsut.
