Kommunit kattussuutsinneqarnerisa kingorna kommunerujussuit
sisamat 2009-mi pilersinneqarput, kingornalu Qaasuitsup Kommunia marlunnut
avinneqarmat 2018-mi Avannaata Kommunia aamma Kommune Qeqertalik
pilersinneqarput.
Avannaatali Kommuniata avinneqarnissaa aamma najukkami
politikeriniit innuttaasuniillu ukiut ingerlanerini kissaatigineqartarsimavoq.
Kommunit kattussuutsinneqarnerisa kingorna kommunerujussuit
sisamat 2009-mi pilersinneqarput, kingornalu Qaasuitsup Kommunia marlunnut
avinneqarmat 2018-mi Avannaata Kommunia aamma Kommune Qeqertalik
pilersinneqarput.
Avannaatali Kommuniata avinneqarnissaa aamma najukkami
politikeriniit innuttaasuniillu ukiut ingerlanerini kissaatigineqartarsimavoq.
Kommunillu avinneqarnissaanut periarfissat pillugit
misissuinerit naammasisimalersut, suliarlu piffissami tulliuttumi politikkikkut
aalajangiiffigisassanngorlugu Naalakkersuisunut tunniunneqareersoq, Avannaata
Kommuniani atorfillit qullersaat Nick Nielsen oqarpoq.
Misissuinerit naammassineqareersut
Avannaata Kommuniani kommunalbestyrelsimut ilaasortaq Anthon
Frederiksen, Naleraq, kommuni avinneqassasoq siunnersuuteqarnikuuvoq, taannalu
aallavigalugu misissuinerit assigiinngitsut ingerlanneqarnikuusut, Nick Nielsen
oqarpoq.
- Anthon Frederiksenip siunnersuutaa kommunalbestyrelsimi
oqaluuserineqarnikuuvoq, oqaluuserineqarneranilu aalajangertoqarpoq kommuuni
avinneqassappat aningaasatigut kingunerisinnaasat misissorneqassasut.
Misissuineq siorna naammasivoq, taannalu innuttaasunut
paasititsiniutigineqareersimalerpoq, taanna oqarpoq.
Kommuuni avinneqassanersoq Avannaata Kommunia nammineerluni
aalajangersinnaanngilaa, tassami Inatsisartut kisimik Kalaallit Nunaanni kommuunit
aaqqissugaanerisa allanngortinnissaanut aalajangiisinnaatitaapput.
- Kommunip suliassani naammassereerpaa, suliarlu
Inatsisartunut aalajangiiffigineqarnissaa siunertaralugu Naalakkersuisunut
tunniunneqareernikuuvoq, kommunaldirektøri oqarpoq.
Tamatuma saniatigut kommunalbestyrelsimi ilaasortaq Bendt B.
Kristiansen, Inuit Ataqatigiit, kommuni avinneqassappat innuttaasut
taasitinneqaqqaassasut siunnersuuteqarnikuuvoq, taannalu aallaavigalugu Avannaata
Kommuniani innuttaasut siorna novembarip 26-ani taasitinneqarput, innuttaasullu
92 procentiisa kommunip avinneqarnissaa kissaatigigaat taasinermi iserpoq.
Periarfissat assigiinngitsut
Avannaata Kommunia avinneqassappat periarfissat
assigiinngitsut misissorneqarsimasut, Bendt B. Kristiansen oqarpoq.
- Ilulissat, Uummannaq, Upernavik Qaanaarlu
tamarmik immikkut kommuninngornissaat misissorneqarpoq. Taassuma saniatigut
Ilulissat immikkut kommuninngornissaa, kiisalu Uummannaq Upernavik Qaanaarlu
ataatsimut kommuninngornissaat aamma misissorneqarpoq.
- Kommunip qanoq avinneqarnissaa suli aalajangiunneqarnikuunngilaq, kisianni taasisut tamarluinnangajammik avinneqarnissaa kissaatigaat, innuttaasullu kissaat malillugu politikkikkut aalajangertoqarnissaa pissusissamisuussaaq, taanna oqarpoq
Kommunit 2009-mi kattussuutsinneqarnissaat sioqqullugu
innuttaasut isumaannik naammaginartumik tusarniaasoqarsimanngitsoq,
taamaattumillu Avannaata Kommuniata avinneqarnissaa pillugu oqallinnermi
innuttaasut isumaasa tusaaniarneqarnissaat pingaartissimagini, Bendt B. Kristiansen
oqarpoq.
Naalakkersuinikkut Ataqatigiissaarisoqatigiit
ataatsimiissasut
Naalakkersuinikkut Ataqatigiissaarisoqatigiit
ataatsimiinnerat ukioq manna siulleq Nuummi 29.-30. januar ingerlanneqassaaq.
Naalakkersuinikkut Ataqatigiissaarisoqatigiit Naalakkersuisunik borgmesterinillu
tallimaasunik inuttalersugaapput, taakkulu nalinginnaasumik ukiumut marloriarlutik ataatsimiittarput, tassani
sammisat pisortat ingerlatsinerannut ataatsimoortumik tunngassuteqartut
oqallisigineqartarlutik.
Taamaattoq ataatsimiinnermi pisussami kommunit
aaqqissuussaanerat nutaaq kisimi sammineqassasoq, tassanilu Naalakkersuinikkut
Ataqatigiissaarisoqatigiit Aaqqissuusseqqinnermik Ataatsimiititaliamik,
siunissami kommuunit aaqqissuussaanerat pillugu isumaliuutissiissummik
inassuteqartussamik, pilersitsinissaq pillugu isummissasut, Naalakkersuisut
paasissutissiipput.
