Nunatsinni kulturikkut aaqqissuussat annerpaasa ilaat Sisimiuni arfininngorpat pissaaq.
Qimussersuarmut peqataasussat 28-t unamminissaminnut piffissaq kingulleq piareersarlutillu aqqutissartik atuaqattaarpaat.
Nunatsinni kulturikkut aaqqissuussat annerpaasa ilaat Sisimiuni arfininngorpat pissaaq.
Qimussersuarmut peqataasussat 28-t unamminissaminnut piffissaq kingulleq piareersarlutillu aqqutissartik atuaqattaarpaat.
Unammineq amerlanersaasa sungiusimareerpaat, sungiusimanngisaalli tassaavoq qimussersuaqarnissaata taama eqqartorneqartiginera. Qisuariaatigineqartut peqqutigalugit ilaat isummersornissamut tunuarsimaarput, unammisussalli pingasut naapinnissaat iluatsipparput.
Uno Jensen Saqqameersoq qimussersuarmut arlaleriarluni peqataasareersoq arnaviaannarnillu qimuttulerluni sukkaniuuttussaq piffissaq kingulleq isummersortunut arajutsisimanngilaq.
Avannaata Qimussersua ukioq manna nunatsinni avataanilu eqqartorneqangaatsiarpoq. Qanoq ippa unammisussaalluni taama eqqartorneqartigisoq?
- Aappaatigut, ajortortaa peerlugu uanga nuannarigaluarpara taamatut avataaniit isiginnaartoqassagutta. Kisianni takusinnaasanni inuit iliuuserisaqattaagaat sakkortunermik, taamaalilluni aamma tunuarsimaaqataanarluni. Uanga nammineq isumanni ajorinngikkaluarpara taamaattunik isiginnaartoqassagutta.
Isiginnaariartussat Usha Vancekkut uniinnarput. Uniinnarnerat qanoq isummerfigisinnaaviuk?
- Nunatsinni massakkut qimuttoqarneq annerusumik siuarsarneqannginnami, taavalu taperserneqarneq imatut qaffariartorani. Immaqa pitsaasumik kinguneqartussatsiarsuaq qanoq pinerpa, inussiarniippallaarnitsigut takkutinngitsoornerat aappaatigut uggorivara. Kisiannilu aamma aappaatigut paasisinnaallugu, isummerfigiuminaakkami. Sakkutooqarfimmi Thulemi Qaanaap eqqaamiui aggertitaasaramik sukkaniuutsitaallutik nuannisartitaallutillu amerikamiunit. Uagut qallunaanit taama pineqartannginnatta, aappaatigut pissangagilaaraluarpara nuannersumik kinguneqarsinnaanera, immaqa ukiuni tulliuttuni sunniuteqarsinnaagaluartoq.
Avannaata Qimussersuata eqqartorneqangaatsiarnera unamminissassinnut arlaatigut sunniuteqassava?
- Naluara, kisianni pisut sakkortusineranni aappaatigut nuannerpallaarunnaaraluarpoq inuit qisuariaataat peqqutigalugit.
Paalu Kristensen Tasiusameersoq Avannaata Qimussersuanut arlaleriarluni peqataasareerpoq, unamminissallu taama eqqartorneqartiginera siornatigut misigisimanngilaa. Avannaatali Qimussersuata aatsaat taama eqqartorneqartiginera nalaappaa.
- Tupaallannarpoq, paasilerlugu taamannak soqutigineqartigisoq qimussersuaqarniarnera. Aatsaat taama soqutigineqartigivoq, Paalu Kristensen oqarpoq.
Assi: Arnaq Nielsen
Avannaata Qimussersua ukioq manna nunatsinni avataanilu eqqartorneqangaatsiarpoq. Qanoq ippa unammisussaalluni taama eqqartorneqartigisoq?
- Tupaallannarpoq, paasilerlugu taamannak soqutigineqartigisoq qimussersuaqarniarnera. Aatsaat taama soqutigineqartigivoq.
Isiginnaariartussat Usha Vancekkut uniinnarput. Uniinnarnerat qanoq isummerfigisinnaaviuk?
- Asuki, isiginnaarusukkaluarpummi immaqa. Tamannami siunertarisimagaluarpaat, kisianni soorunami uggornarpoq qimussimik taama soqutiginnittut ajattussagaanni.
Avannaata Qimussersuata eqqartorneqangaatsiarnera unamminissassinnut arlaatigut sunniuteqassava?
- Unamminissatsinnut sunniuteqangaarnavianngilaq. Uagutsinnut unammisarpugut sukkaniulluta. Taamaammat immaqa taakkua puigussavagut unammilerutta.
Erneeraq Jeremiassen Aasianneerpoq. Amerikamiullu qimussersuit unamminissaannut aningaasaliinerat nunatsinni avataanilu inuit oqallinnerannik assortuunnerannillu pilersitsimmat oqallittut ingalassimaniartariaqarsimavai.
Avannaata Qimussersua ukioq manna nunatsinni avataanilu eqqartorneqangaatsiarpoq. Qanoq ippa unammisussaalluni taama eqqartorneqartigisoq?
Erneeraq Jeremiassen Avannaata Qimussersuanut aappassaat peqataassaaq.
Assi: Arnaq Nielsen
-Aallaqqaammut sakkortulaarpoq. Kisianni aamma nunarsuarmioqataallutik oqaluttuartut, qinikkallu taama oqaluttuartut taamarsuaq tiguneqarnissaa ilimaginngikkaluarakku. Nunarsuarmioqataanerput ajuissortumik kinguneqarneq ajorpasimmat, aamma qangaaniilli (USA-p aaqq.) tapertarsimagaatigut paasileratsigu. Uatsinni eqqarsaataavallaarnani, uumasuutigut kisiisa silarsuarinerugatsigit. Kisianni tusakkat sakkortupput ilaatigut, aamma inuit allatai takulaarnerisigut ilaanni atuarpiagassaanngillalluunniit sakkortunermik. Ajuusaarnarpoq peqataasuulluni inuit taama sakkortutigisumik qisuariarnerat.
Isiginnaariartussat Usha Vancekkut uniinnarput. Uniinnarnerat qanoq isummerfigisinnaaviuk?
-Immaqa isiginnaaraluarunik ajoqutaanavianngitsut. Kisianni oqallinneq taama annertutigitillugu paasinarpoq uniinnarnerat.
Avannaata Qimussersuata eqqartorneqangaatsiarnera unamminissassinnut arlaatigut sunniuteqassava?
-Unamminissamut piareersarnikuuvugut aggerfipput aallaavigalugu, unamminissamullu attuumassuteqanngillat. Piareersaatigut ilimanarpoq tamatta ingerlatissagigut. Piaaraluta kingaalaniarunnanngilagut, imaluunniit arlaatigut takutitsiniarunnanngilagut. Sunniuteqanngilaq, ingerlaassaagut nuannarisarput aallaavigalugu. Nuannersumik pisoqartuaannarpasippoq, aatsaat aappassaat ilaaleraluarlunga nuannertorujussuugami.
