Avatangiisinik illersuiniaq Paul Watson Japanimut tunniunneqassanngilaq
Paul Watson Japanimut tunniunneqassanngitsoq Nuummilu pineqaatissinneqarsimasunut inissiisarfimmiit iperagaanissaa maanna utaqqisaasoq avatangiisinik illersuiniap eqqartuussissuserisuata ilisimatitsissutigaa.
Arktisk assiliartaa: Leiff Josefsen
Avatangiisinik illersuiniaq Paul Watson Japanimut tunniunneqassanngilaq. Inatsisinik atuutsitsinermut ministereqarfiup tamanna aalajangeraa eqqartuussissuserisuata Julie Stagep Ritzauimut oqaatigaa.
Julie Stage naapertorlugu Watson maanna Kalaallit Nunaanni pineqaatissinneqarsimasunut inissiisarfimmit iperagaavoq Frankrigimullu angerlarsinnaalerluni. Københavnili aqqusaarlugu imaluunniit Kalaallit Nunaanniit toqqaannartumik Frankrigimukassalluni.
Watson Nuummi juulip 21-ani umiarsualivimmi tigusarineqarpoq, taamanili Nuummi pineqaatissinneqarsimasunut inissiisarfimmi tigummigallarneqalerluni.
Avatangiisinik illersuiniaq Sikuiuitsumi kujallermi 2010-mi pisimasumut atatillugu eqqartuussivimmi sassartinneqassasoq Japanip piumasaraa. Japanip Paul Watson arfannianik akornusersuisimasutut aamma umiarsuarmi arfanniummi inuttamik ajoqusiisimasutut unnerluutigaa.
Paul Watsonip juulip 21-ani tigusarineqarneraniit juulip 22-ani eqqartuussivimmit tigummigallarneqarnissaanik aalajangertoqarneraniilli Kalaallit Nunaanni Eqqartuussivimmi arlaleriarluni eqqartuunneqarpoq. Watsonip illersuisui unnerluussisullu eqqartuussinerni assortuuttaqalutik.
Tigummigallarneqarneranut pinerluut pineqartoq naleqqutinngitsoq illersuisut pingaartumik tunngavilersuutigaat — tassa Watsonip pinerlunnerarneqarnera ima ilungersunartiginngilaq sivisunerusumik tigummigallarneqarnissaanut, tassa qaammatini tallimangajanni.
Qaammatit tallimat missaanni tigummigallarneqareerluni maanna iperagaavoq Frankrigimullu angerlarsinnaanngorluni, tassani ilaquttanilu najugaqarput. Taanna amerikamiutut canadamiutullu innuttaassuseqarpoq.
Watsonip tigusarineqarnera nunani tamalaanit malinnaaffigineqarpoq. Ilaatigut Frankrigip præsidentiata Emmanuel Macronip Watsonip Japanimut tunniunnissaa itigarteqqullugu Danmark kajumissaarlugu.
Inatsisinik atortitsinermut ministereqarfik Japanimit tunniussinissamik aggustip aallaqqaataani qinnuigineqarpoq.
Ministereqarfiup maanna taanna aalajangiiffigaa, tassalu Japanip qinnutigisaa itigartinneqassasoq.
