EQQAKKAT
Avatangiisinut Naalakkersuisoq Avannaata Kommuniani ammasumik ikuallaasinnaanermut akuersinissaminut piareersimasoq
Avatangiisinut Naalakkersuisoq, Kalistat Lund Avannaata Kommuniani utaqqiisaarutaasumik eqqakkanik ammasumik ikuallaasinnaanissamut akuersinissaminut piareersimanerarluni Inatsisartuni apeqqarissaarneqarnermini oqarpoq. Avannaata Kommuniata tamanna tusarlugu nuannaajallappoq.
Annonse
- Piareersimavunga kommunit ikuallaanissamut qinnuteqassappata aasamut akuerissallugit.
Kalistat Lund (IA) Avannaata Kommuniani eqqakkanut tunngatillugu pilersaarummik qaqugu takusaqassanerlutik Jens Frederik Nielsenimit aperineqarami taama akivoq.
Avannaata Kommunia piffissami sivitsortumi Nunalerinermut, Imminut pilersornermut, Nukissiornermut Avatangiisinullu Naalakkersuisumik ilaatigut sakkortuuliorfiusumik attaveqartarsimavoq – ilaatigut atorfilittatigoortumik aammali Kalistat Lundip Ilulissani novembarimi 2023-imi kommunip allaffiani ataatsimeeqatigineratigut.
Kalistat Lundip erseqqissaatigaa eqqaavernermut tunngatillugu pilersaaruteqarnissaq kommunit nammineerlutik akisussaaffigigaat. Naalakkersuisulli takusinnaappagu kommunit eqqaaveqarnermut pilersaaruteqarneranni pitsaasumik ingerlasut, ammasumik ikuallaanissamut akuersissummik tunniussisinnaasut oqaatigalugu.
Avannaata Kommunia tupaallattoq
Kalistat Lundip akuersissummik tunniussinissaminut piareersimaneraluni oqarnera Avannaata Kommuniani borgmesterimut Palle Jerimiassenimut (Attaviitsoq) nuannaajallatsitsivoq.
- Taamaattumik nuannaarutingalugu tupaallaatingaara, Inatsisartuni ataatsimiinnermi Naalakkersuisut Inatsisartuni aperineqarsinnaaneranni tusangara. Alloriarneruvoq uagutsinnut assut pingaarutilik, tassa utaqqiisaasumik inoqarfiit ilaanni inoqarfinni ammasumik ikuallaasinnaatitaanissarput, kommuni tamakkerlugu eqqagassalerinermik pilersaarupput annertooq tamakkerlugu piviusunngortinnissaata tungaanut, Palle Jerimiassen oqarpoq.
Aasaq takkuppoq, tamannalu aamma isumaqarpoq eqqagassat takkutilersut. Nunaqarfinnili innuttaasut aasarik eqqagassaqarfiunngitsoq naatsorsuutigisinnaalinnguatsiarpaat.
- Naalakkersuisup qinnuteqaaterput paasissutissallu tamaasa uagutsinnut piniarnikuusatik tigoreernikuuat, apeqqutaaginnalerunarporlu ullualunnguit qaangiuppata ammasumik ikuallaasinnaanitsinnut akuersissutip uagutsinnut apuunnissaa, Avannaata Kommuniani borgmesteri, Palle Jerimiassen naggasiivoq.
