Bendt B. Kristiansen: Umiarsualivik tattorparput - aaqqiissuteqaqatigiitta
Takornariaqarnerulernerup Ilulissanilu umiarsualivimmi umiatsiaqarlerulerlunilu umiarsuaqarnerulernerata kingunerisaanik umiarsualivik tattoqippoq. Aaqqiissuteqaqatigiinnissamut piffissanngortoq, Avannaata Kommuniani kommunalbestyrelsimi ilaasortaq, Bendt B. Kristiansen isumaqarpoq.
Foto: Sermitsiaq
Ilulissani umiarsualivik piffissami sivisuumi tattoqisaaffiuvoq, ukiunilu kingullerni imaani angallassinerup takornariaqarnerullu ineriartornerata kingunerisaanik tattoqisaanneq annertusiartuinnarpoq, aaqqiissuteqaqatigiinnissaq piffissanngortoq, Bendt B. Kristiansen Inuit Ataqatigiinniit kommunalbestyrelsimi ilaasortaq isumaqarpoq:
- Ukiut kingulliit takornariaqarnermik angallassisartut amerliartornerisa kingunerisaanik umiarsualivik tattorliuuffioreersoq suli annersumik tattoqisaaffiuleqqavoq, ukiunilu tulliuttuni ajornartorsiut annikilliunnarani iliuuseqaqatigiinngikkutta.
Taarsigassarsisinnaanermut periarfissagissaarnerulerneq
Periarfissaq nutaaq saqqummerpoq. Kommunitut taarsigassarsisinnaanermik periarfissaat nutarterneqarnikuupput. Naalakkersuisummi ukiup nutaap aallartinnerani nalunaarutigaat kommunit maannakkut 4 milliarder koruunit tikillugit realkreditimik taarsigassarsisinnaalertut.
Tamannalu ilaatigut takornarialerinermik angallassisutinut umiarsualiviliorsinnaanerit aningaasalersorsinnaanissaannut ammaassisoq, Bendt B. Kristiansen allappoq. Avannaata Kommuniani umiarsualiveqarnermi aaqqiissutissamik aningaasaleeqatissaqaruni piumassusermik peqartoq qularinnginnerarpaa:
- Kommunitut taarsigassarsisinnaanermik periarfissaat nutarterneqarnikuupput, tamannalu ilaatigut ammaassivoq takornarialerinermik angallassisutinut umiarsualiviliorsinnaanerit aningaasalersorsinnaanissaannut. Avannaata Kommuniani umiarsualiveqarnermi aaqqiissutissamik aningaasaleeqatissaqaruni piumassusermik peqartoq qularinngilara, Bendt B. Kristiansen oqarpoq naggasiillunilu:
- Naalakkersuisut peqatigalugit takornarialerinermut umiarsualiveeqqamik pilersitsisinnaanermik periarfissat soqutiginaqaat, oqaloqatigiitta siunissami aaqqissuussaanerit eqaallisarneqarnissaat siunertaralugu, umiarsualivilioqatigiillutalu.
