Bidenip Trumpip Kalaallit Nunaat pillugu oqaasii isornartorsiorai
- Taamaaliortanngilagut, præsidentiusimasut Joe Bidenip Trumpip Kalaallit Nunaat pillugu oqariartuuteqartarneranut oqarpoq.
USA-mi præsidentimut qineqqusaarnermi Joe Biden siusinnerusukkut tunuarsimaarsimagaluaruni qinersinerup inerneranut allannguuteqartitsinavianngitsoq USA-mi præsidentiusimasoq Joe Biden BBC-mit apersorneqarnermini oqarpoq.
Assi: Nathan Howard/Reuters/Ritzau Scanpix
Demokraatit sinnerlugit præsidentiunikoq Joe Biden BBC-mit apersorneqarnermini præsidentitut taartini republikaneri Donald Trump isornartorsiorpaa.
Biden januaarimi præsidentip illorsuaniikkunnaarnerminiilli siullermeerluni apersorneqarpoq.
Trumpip amerika allisinniarlugu pingaartitsinera, Canada, Kalaallit Nunaat Panamallu kanalia pillugit oqaasii Joe Bidenip “taamaaliortanngilagut" taavai.
- Kina præsidenti taamatut oqaluttarami? Taamaaliortanngilagut. Kiffaanngissuseq, innuttaasut naalakkersueqataanerat periarfissallu pingaartippavut - tiguaaniarnerunngitsoq, BBC-mut oqarpoq.
Bidenip præsidentiunerata nalaani Finland Sverigelu Natomut ilanngupput.
Trumpi pisuulluni USA-p Europami iligisai tapersersuiunnaartut, tamannalu Nato-p tunngavianut navianartorsiortitsisoq Biden isumaqarpoq.
Ajalusoornissaq ernummatigigaa
Iligiinnerup ajalusoornissaa "assut ernummatigalugu" oqaatigaa.
- Piviusunngussappat oqaluttuarisaanermi nutaajunerpaami allannguissasoq isumaqarpunga.
- Nunatut kisiartaalluta inuit ataatsimoortissinnaallugillu nunarsuarmi siulersuisinnaavugut, taamaanngippat Kina Ruslandilu siuariartussapput, Biden BBC-mut oqarpoq.
Joe Biden Chicagomi apriilimi aaqqissuussaami USA-mi "kunngiusoqanngitsoq" oqarpoq.
Tamanna pissutigalugu BBC-mi tusagassiortup Bidenip Trumpi naalakkersuisut siuttuattut inatsimmit tunngaviusumut killilersorneqartutut pinnani kunngikkormiutut pissusilersornerusutut isigineraa aperaa.
Bidenip tamanna toqqaannartumik akinngilaa, BBC-li naapertorlugu Trump "republikanerit præsidentiattut pissusilersunngitsoq" oqarpoq.
Joe Bidenip Donald Trump 2020-mi qinersinermi ajugaaffigaa, tamatumalu kingorna 2021-miit 2025-mut præsidentiulluni. Trumpilu 2024-mi novembarimi qinersinermi qinigaaqqikkami præsidentinngoqqippoq.
/ritzau/
