Blok 4-mi ikuallattoqartoq: Inunnik ajoqusertoqanngilaq
Ataasinngormat unnukkut blok 4-mi ikuallattoqarneranik Kalaallit Nunaanni Politiit nalunaarfigineqarput. Politiit qatserisartullu sukkasuumik ikuallaffimmut apuupput, ikuallattorlu qaminneqarpoq.
Ataasinngormat unnukkut ikuallattoqarmat qatserisartut Blok 4-mukarput.
Leiff Josefsen
Ataasinngormat unnukkut nal. 20.28 Nuummi blok 4-mi ikuallattoqarneranik Kalaallit Nunaanni Politiit nalunaarfigineqarput.
- Nalunaaruteqartup oqaloqatiginerani aamma ikuallattoqarneranik kalerrisaat aallartittoq tusaasinnaavarput. nal. 20.30-mi politiit apuupput, kinguninngualu qatserisartut apuullutik. Ikuallanneq qamilertorneqarpoq, Kalaallit Nunaanni Politiit pigaartuisa pisortaat Anette Ostenfeldt Sermitsiamut oqarpoq.
Innaallagissap aqqutaani attuuttoortoqarneranik pissuteqarunarpoq
Ikuallattoqarnerani inunnik ajoqusertoqarsimanngitsoq, pigaartut pisortaat ilisimatitsivoq. Ikuallattup qaminniarneqarnerani inissiarsuarmut qaninnerpaamik najugallit oqartussaasut qimagussortippaat.
Ikuallattoqarnerani pinerluttoqarsimaneranut takussutissaqanngilaq:
- Kabeleqarfimmi innaallagissap aqqutaani attuuttoortoqarnera ikuallannermut pissutaasoq qatserisartut naliliipput, Annette Ostenfeldt ilisimatitsivoq.
