Borgmesterip kunngikkormiut qimussernissamut qaaqquai

Borgmester Malik Berthelsen kunngi Frederik, dronning Mary taakkualu qitornaat prins Vincent (Minik) aamma prinsesse Josephine (Ivalo) Sisimiunut tikimmata qaaqqusivoq

Borgmester Malik Berthelsen kunngikkormiunut meeraanullu oqalugiarpoq.

-Ataqqinartorsuaq kunngi Frederik, ataqqinartorsuaq dronning Mary meeqqasilu marlulissat Minik aamma Ivalo, Kalaallit Nunaannut angalanissinnut atatillugu Sisimiunut tikilluaritsi, marlunngormat ullaap tungaani kunngikkormiut Sisimiunut tikinneranut atatillugu borgmesteri Malik Berthelsen oqarpoq.

Naak qulisimallunilu anorlilaaraluartoq, Sisimiuni talittarfittaami kunngikkormiut qitornaallu tikilluaqquniarlugit inuppassuit takkupput.

Pilluaqqusinerit

Borgmester Malik Berthelsen kunngikkormiunit tikeraarneqarngaarpoq, borgmesterilu sanimini nutserisoqarluni kalaallisut oqalugiarpoq. Oqalugiaat minutsinik qulinik sivisussuseqarpoq, Sisimiunilu innuttaasut oqalugiaammut ersaattaattarlutik, illartarlutik nuannaarlutillu nilliapput.

Kunngikkormiut ernerat, kunngissaq Christian, sapaatip-akunnerata siuliani soraarummeerluni allagartartaarmat borgmesterip pilluaqquai.

Dronning Mary ukiorpassuarni ingammik Kalaallit Nunaanni meeqqat inuusuttullu atugarisaannik suliniuteqarnini pillugu Kalaallit Nunaanni nersornaammik akimanerpaamik, Namminersorlutik Oqartussat nersornaasiuttagaannik Nersornaammik kuultiusumik nersornaaserneqarmat, borgmesterip aamma pilluaqquaa.

Kunngikkormiut qimussernissamut qaaqqugai

Malik Berthelsenip aamma Sisimiut Kangerlussuullu akornanni pinngortitarsuaq eqqartorpaa, aamma kunngikkormiut qasuersaarnissartik pisariaqartippassuk qimusserlutik, pisuttuarlutik, sisorarlutik qamuteralannillu angalallutik qasukkarsimaarnissamut periarfissarpassuaqarnerarpai.

-Qimusserniarlusi eqqarsarussi upernaakkut Sisimiunit Kangerlussuarmut qimusseqataasinnaavusi. Uanga nammineq qimussertalernikuuvunga, taamaattumik oqaannarumaarpusi, borgmesteri kunngikkormiunik qaaqqusilluni taama oqarpoq.

Kunngikkormiut qaaqqusissut tigulluarlugu borgmesteri qimusseqatigissaneraat pissanganarpoq.

Sisimiunut tikeraareerunik kunngikkormiut Nuummut ingerlaqqissapput, sisamanngorpallu tikissapput.

Powered by Labrador CMS