KL

DK

Borgmesterip nittartakkakkut oqalliseriaaseq torerneroqqugaa: - Meerartatsinnut maligassiusuusariaqarpugut

Qeqqata Kommuniani borgmesteri, Malik Berthelsen inuit attaveqatigiittarfiini oqallittariaaseq torernerusariaqartoq suaarutigaa. Taassuma innuttaasut oqaatsitik qanoq kinguneqarsinnaanersut eqqarsaatigeqqullugit imminullu ataqqinnerulernissaannik kajumissaarpai.

Qeqqata Kommuniani borgmesteri, Malik Berthelsen (S)
Tôrtia Reimer-Johansen
Journalist
Offentliggjort

Nittartakkakkut inuit attaveqaqatigiittarfiinut iseraanni kikkunnit tamanit takuneqarsinnaasumik uparuartuineq akerartuinerilluunnit takussaasarput, ingammik politikkikkut oqallittoqartillugu.

Oqallittariaaseq torernerusariaqaraluartoq, Qeqqata Kommuniani borgmesterip, Malik Berthelsenip oqariartuutigaa:

- Inuit attaveqatigiittarfiisa nunarsuarmi atugaalernerisigut tamanut ammasumik killilersugaanngitsumillu isummersornissap ajornannginnerulernera tamat oqartusaaqataanerat eqqarsaatigalugu pitsaasuuvoq. 

- Taamaakkaluartoq kikkunnit tamanit takuneqarsinnaasumik oqaatsit torinngitsut atorlugit inoqatinik aalajangersimasunik inuttarsiulluni uparuartuineq akerartuinerluunniit isumaqarpunga killissammik qaangiinerullunilu ileqqorissaarnerunngitsoq. 

Taassuma oqaluttuaraa perosarsimarpasinngitsigisunik pissusilersuutigineqartartut inoqatinut qanoq kingunerlussinnaaneri ilanngullugit eqqarsaatigineqartariaqartut.

Ilanngullugulu oqaatigalugu politikerit aamma inuinnaammata misigissuseqartut ilaqutaqarlutillu:

- Tassami kikkut tamarmik takusinnaasaannik nikassarneqarneq pineqartunut eqqarsartaatsikkut imminullu naleqartinnermut annertuumik innarliisinnaavoq. Taamaattumik nammineq attaqineqarluta pineqarusunnitsituulli inoqatigut aamma nammineq ileqqorissaarfigisassagigut inussiarnersumik kaammattuutigissavara.

- Politikerit aamma inuvinnaavugut, ilaqutaqarlutalu.

- Politikkimi kommunimiluunniit suliatta pitsaanerusariaqarneri imaluunniit aalajangiinitta isumaqatiginnginneri pissutigalugit isornartorsiorneqartarnerput pissusissamisoortarpoq. Kisianni suliat pinnagit, inuttarsiullunili eqqunngitsumillu tunngaveqarluni qinikkanik pasilliisarnerit akerartuisarnerillu isumaqarpunga nutaanut qinikkatut sulinissamut pilerinarsaataanatik nangaatitsilertarsimassasut.

- Meerartatsinnut maligassiusuusariaqarpugut

Borgmesterip ilanngullugu oqariartuutigaa inersimasut pissusilersuutaat meeqqanit takuneqartarmata.

- Qularinngilara inuit attaveqaqatigiittarfiini pissusilersuutigut meerartatta arajutsisimanavianngikkaat. Apeqqutigineqarsinnaavorlu meeqqat akornganni qinngasaaruttarneq tassanngaanniit ilaatigut aallaaveqarsimasinnaanersoq? Tassami atuartut peqqissusaasa misissuivigineqarnerani paasivarput atuartut affaat sinnerlugit qinngasaarneqarsimasutut misigisarsimasut, Malik Berthelsen oqarpoq.

Nunatsinni inuuneq meeraanerlu nuannernerusoq anguneqassappat borgmesterip  kaammattuutigaa ullumikkut inuunerput qanoq nuannernerusumik atorsinnaaneripput eqqarsaatigissagipput:

- Eqqaamassavarpummi inuit nuannersussarsiortut nuannersumillu eqqarsaateqartut ilagalugit inuuneq oqinnerullunilu nuannernerusarmat.

- Qularaaralu inoqatitsinnik nikassaasimatilluta pilluarnerulertarsimanissarput.

inuiaqatigiit samfund

ATORFIIT Se alle jobs

Powered by Labrador CMS