Illoqarfiit pingaarnersaanni innuttaasut
kommunit sullissinerat naammagisimaarnerusarpaat, illoqarfinni nunaqarfinnilu
innuttaasut naammaginninnginnerusartut,
kommunimmi sullissinerat unammillernarnerusoq misigisaramikku.
Kommunit aaqqissuussaanerannik nalilersuinermi 40-nik quppernilimmi taama
inerniliisoqarpoq. Naalakkersuisut politikkikkut ataqatigiissaarisuisa Nuummi
sapaatip-akunnerani kingullermi ataatsimiinneranni nunamut namminermut naalakkersuisup Jess Svanep (S) borgmesterinut
taanna saqqummiuppaa.
Illoqarfiit pingaarnersaanni innuttaasut
kommunit sullissinerat naammagisimaarnerusarpaat, illoqarfinni nunaqarfinnilu
innuttaasut naammaginninnginnerusartut,
kommunimmi sullissinerat unammillernarnerusoq misigisaramikku.
Kommunit aaqqissuussaanerannik nalilersuinermi 40-nik quppernilimmi taama
inerniliisoqarpoq. Naalakkersuisut politikkikkut ataqatigiissaarisuisa Nuummi
sapaatip-akunnerani kingullermi ataatsimiinneranni nunamut namminermut naalakkersuisup Jess Svanep (S) borgmesterinut
taanna saqqummiuppaa.
– Innuttaasut illoqarfiit pingaarnersaasa
avataani najugallit kommunalbestyrelsip
susassaqarfitik ilisimanngikkai aamma
isumaqarput. Misissuinermi maanna takusinnaavarput kommunit kattunneqarnerannut atatillugu najukkami oqartussaaqataanermik nukittorsaaniarluta siunertarput
iluatsinngitsoq, illoqarfinni nunaqarfinnilu
innuttaasut kommunalbestyrelsi tatiginngimmassuk kommunimilu sullissineq
unammillernartoqartimmassuk, Jess Svane
oqarpoq.
Kommunit kattunneqarneranni siunertaasutut kommunit namminersorlutillu oqartussat marloqiusamik ingerlatsiunnaarnissaat anguniarneqarsimagaluartoq
iluatsinngitsoorsimasoq oqarpoq.
– Innuttaasut kommunimut saaffiginnittut suliassat illoqarfiit pingaarnersaanni,
najukkamiunngitsoq, aalajangiiffigineqartartut suli misigisarpaat, Jess Svane oqarpoq.
Politikkikkut ataqatigiissaarisut ataatsimiinneranni suleqatigiissitaq pilerseqqinneqassasoq, kommunillu aaqqissuussaanerat
misissorneqassasoq borgmesterit isumaqatigiissuteqarfigai. Kommunip aaqqissuussaanerata nutaap aningaasaqarnikkut kingunerisinnaasai ilaatigut misissorneqassallutik.
– Kommunit qanga aaqqissuussaanerannut uteqqittoqassangaluarpat aningaasatigut kingunissai maanna misissorneqassapput. Avannaata Kommuniata kommunip
avinneqarnissaanut innuttaasunik taasisitsinissamik aalajangernera ataqqineqarpoq, borgmesterillu kommunalbestyrelsi
kommunip aaqqissugaaneranik suleqatigiissitami peqataajumanersut siulliullugu
paasiniaqqaarpaa, Jess Svane oqarpoq.
Akisussaaffimmik
avitseqatigiinneq iluaqutaasoq
Kommune Qeqertalimmi Kommuneqarfik
Sermersuumilu illoqarfiit pingaarnersaata
avataaniittunut akisussaaffimmik agguaassisarneq misilittagaqarfiuvoq, tamannalu
qanimut oqartussaanermik nukittorsaataavoq.
– Ukiualuit matuma siorna missingersuutit isumaqatiginninniutigineqarneranni
assersuutigalugu peqqinnissamut, sunngiffimmi sammisaqarnermut pinaveersaartitsinermullu tunngasut Tasiilamut aalajangiiffigisassat tunniuppagut, tamannalu
najukkami suliniutinik siuarsaasimavoq.
Inoqarfinnullu mikinerusunut sulisunik
kajungilersitsiniarneq suli unammillernarpoq. Assersuutigalugu Tasiilami sanaartornermut ilisimasalimmik ingeniøritut
ilinniagaqarsimasumik sivisuumik ujaasinikuuvugut, iluatsinngilarli, Kommuneqarfik Sermersuumi borgmesteri Avaaraq Olsen
(IA) oqarpoq.
Kommune Qeqertalimmi sulisut nuunneqartarnerat misilittagaqarfigineqarpoq.
– Suliassarpassuarnik suliaqarnermi
ikiorneqarnissamik pisariaqartitsisoqaleraangat Kangaatsiamit, Aasianniit Qasigiannguaniillu sulisunik illoqarfimmut allamut
aallartitsisarneq misilittagaqarfigaarput.
Sulisussanillu nutaanik atorfinitsitsisoqaraangat ilisimatitsisarpugut suliamut
atatillugu angalasoqarsinnaasoq, Kommune
Qeqertalimmi borgmesteri Ane Hansen (IA)
oqarpoq.
Illoqarfinni minnerni nunaqarfinnilu
innuttaasut kiffartuussinerup naammagisimanngikkaat paasisinnaavaa, tamannalu
ilaatigut pissutaasinnaavoq Tusassip, Nukissiorfiit pisortallu suliffeqarfiutaanni allani
digitalimik kiffartuussinerup atulersimaneranik suliassat qitiusumit suliarineqartarmata
taamaalillunilu najukkami innuttaasunullu
qaninnerusumik kiffartuussisoqarpallaarunnaarneranik kinguneqarluni.
Pisuut nammaqataassasut
Borgmesterit kommunit aaqqissugaanerisa
nalilersorneqarnerannut assigiinngitsunik
isumaqarlutillu qisuariarput. Innuttaasut
naammagisimaarinninnerannik misissuinermi nuna tamakkerlugu aperineqartuni
4.274-ini 762-it akissuteqarput.
– Naalagaasuuguma kommunini tamani atugassarititaasut assigiinngimmata
Kalaallit Nunaanni kommuni ataasiinnaassagaluarpoq. Avannaata Kommunia
assersuutigeriartigu, aalisartut ukiumut
600 millionit koruuninik isertitaqarsinnaasarput, Kommune Kujallermi 3-4 millionit
koruuninik isertitaqarsinnaallutik. Kommuninilu atugassarititaasut taama assigiinngitsigimmata naammaginninnginneq
pinngortuassaaq, Kommune Kujallermi
borgmesteri Stine Egede (IA) oqarpoq, taannalu Qeqqata Kommuniani borgmesterimit
Malik Berthelsenimit (S) taperserneqarpoq.
Kommunit avinneqarnissaat imminut akilersinnaanngitsoq taanna isumaqarpoq.
– Innuttaasut illoqarfiit pingaarnersaasa
avataani najugallit borgmestereqanngitsullu
naammaginninngittuassapput, kommunilli
avinneqaqqissappata kommunit angisuut
annertunerusumik aningaasaatillit kommunit mikinerit qanoq ikiorsinnaaneraat
misissortariaqarparput. Kommunit minnerulersillugit avissaarteqqinnissaat imminut akilersinnaassanngilaq, aningaasatigut
oqimaaqatigiissaarisinnaannginnerat pissutigalugu. Taamaattumik misissortariaqarparput kommunit pisuut qanoq ilillutik
nanertuummik nammaaqataassanersut,
Malik Berthelsen oqarpoq.
Kommunalbestyrelsimut
tatiginninneq annikitsoq
»Kommunalbestyrelsit inoqarfinni soqutigisanik ajornartorsiutinillu aaqqiissuteqarfeqarnissaannut tunngatillugu tatigineqarnerat aarlerinartumik appasissumiippoq,
kommunit aaqqissuussaanerat pillugu
naliliinermi kommunalbestyrelsi pillugu
tunngasortaani inerniliutigineqarpoq. Malik
Berthelsenip tamanna paasisinnaavaa, innuttaasulli aalajangiisoqassatillugu peqataaneq ajormatut tikkuarlugu.
– Kommunalbestyrelsi aalajangikkani
suliniutinilu pillugit pitsaanerusumik
attaveqarsinnaanissaa takusinnaavara.
Ugguaraarali innuttaasut isornartorsiuinermik nuannarisallut innuttaasunik
ataatsimiititsinerni peqataaneq ajormata,
taarsiulluguli qarasaasiap saanut ingillutik
inuit attaveqaqatigiittarfiisigut isornartorsiuillutik. Innuttaasunik ataatsimiititsinerit
aalajangiisoqarnissaanik sunniinissamut
tamat oqartussaaqataanerat tunngavigalugu periarfissaapput, inuit attaveqaqatigiittarfiisigut taamaaliortoqarneq ajorpoq,
Malik Berthelsen oqarpoq. Kommuneqarfik Sermersuumi borgmesterip Avaaraq Olsenip
aamma tamanna uggoraa.
– Innuttaasut peqataatikkusukkatsigit
innuttaasunillu ataatsimiititsinissamut
qaaqqusigaangatta peqataasut ikittuaraasarput, tamannalu uggornarpoq. Innuttaasunik
peqataatitsisarneq politikkikkut qanoq
suliarisinnaanerlugu eqqarsaatersuutigisariaqarparput, oqarpoq.
Kommunalbestyrelsimi ilaasortat
atugaat
Naliliineq assigiinngitsorpassuartigut
isigineqarsinnaasoq Kommune Kujallermi
borgmesteri Stine Egede isumaqarpoq.
Kommunalbestyrelsimi ilaasortaasunut
naatsorsuutigineqartartut, taakkua piginnaasaat suliatigullu sinaakkutaat pillugit
oqallittoqarnissaa pisariaqartoq taanna
isumaqarpoq.
– Kommunalbestyrelsimut ilaasortat ilaat
politikkikkut suliassaminnik suliaqarput,
allalli qinigaangamik taava tassa. Taamaattumik qinikkat sulinissaannut sinaakkutit
misissortariaqarpavut. Kommunalbestyrelsi
qanoq sulissava, qinersisoqareeraangat
ilaasortat nutaat ilaasortanngortarput,
taakkulu sulinissaannik ilinniartinneqassapput. Borgmesteri borgmesterillu tullia
kisimik kommunalbestyrelsimut ilaasortatut akissarsiaqartarput, ilaasortallu allat
ataatsimiinnerni peqataanertik pillugu akissarsisinneqartarput. Kommunini qinikkat
qanoq naatsorsuuteqarfiginerlugit oqallisigisariaqarparput, Stine Egede oqarpoq.
Kommunalbestyrelsip sulineranut sinaakkutissat Inatsisartuni oqallisigineqarnissaat
pisariaqartoq Qeqertalimmi borgmesteri
Ane Hansen aamma isumaqarpoq.
– Kommunalbestyrelsimut ilaasortat
ataatsimiinnerni peqataanertik aallaavigalugu akissarsisinneqartarput, akissarsialli
amerlanertigut sulinermik annaasaqarnerup
matussusernissaanut annikippallaartarput,
tamannalu aamma pissutaasinnaavoq kommunalbestyrelsimut ilaasortat kommunimi
illoqarfinnut allanut paasisassarsiorlutik
angalanernut peqataajumannginnerannut,
taamaaliornermikkut sulinerminnit isertitatik annaassagamikkit, Ane Hansen oqarpoq.
