Brigitte Bardotip Watsonip tigummigallarneqarnera pillugu Danmark attaveqarfigaa
Brigitte Bardot inuit amerlasuut assigalugit Paul Watson pillugu Danmarkimut attaveqartut ilagaat
Pisoq amerlasuunit malinnaavigineqarpoq. Illoqarfissuarni arlalinni akerliussutsimik takutitsisoqarpoq, tassanilu Danmark kajumissaarneqarsimavoq Watson Japanimut tunniuteqqullugu.
Assiliisoq: David Dee Delgado/Reuters/Ritzau Scanpix
Franskip isiginnaartitsisartup Brigitte Bardotip Canadamiu Amerikamiu avatangiisinik illersuiniaq Paul Watson juulip naaneraniilli Kalaallit Nunaanni parnaarussaaqqasoq pillugu Danmarkimi inatsisinik atortitsinermut ministereqarfik attaveqarfigisimavaa.
Tamanna Inatsisinik atortitsinermut ministereqarfiup Folketingimi inatsisinik ataatsimiititaliamut akissutaani atuarneqarsinnaavoq.
73-inik ukiulik Paul Watson Nuummi umiarsualivimmi Kalaallit Nunaanni Politiinit juulip 21-ani tigusarineqarpoq, tigusarinninnermi qallunaat politiivi ikiortigineqarput.
Japanimi tigusarinninnissamut peqqussut tunngavigalugu tigusarineqarpoq.
Japanip Paul Watsonip Sikuiuitsumi kujallermi 2010-mi pisimasumut atatillugu eqqartuukkusullugu tunniunnissaa piumasaraa.
Japanimi oqartussaasut oqarnerat aallaavigalugu japanimiut arfanniat piniarnerisa nalaanni akornusersorsimavaat.
Aamma inummut ajoquseeqataasimasutut unnerluutigineqarpoq.
Watson pisuunnginnerarpoq.
Danmarkimi Inatsisinik atortitsinermut ministereqarfiup aalajangertussaavaa Watson Japanimut inatsisitigut malersorneqarsinnaanngorlugu tunniunneqassanersoq.
Pisoq amerlasuunit malinnaavigineqarpoq. Illoqarfissuarni arlalinni akerliussutsimik takutitsisoqarpoq, tassanilu Watson Japanimut tunniuteqqunagu Danmark kajumissaarneqarluni.
90-inik ukiulik Bardot tigusarinninneq peqqammertoq franskit aviisiannut Le Parisienimut "Paul annaanniarlugu sapinngisatsinnik iliuuseqartariaqarpugut" oqarpoq.
Inatsisinik atortitsinermut ministereqarfik folketingimut akissummini aamma ilisimatitsivoq aallartitaqarfimmit innuttaasorpassuarnillu attaveqarfigineqarsimalluni.
/ritzau/
