Donald Trump Jr. Nuummut mittarfimmut marlunngornerup ullaap tungaani mippoq, tikeraarneralu ataataata Donald Trumpip oqaatigisimasaanut takussutissiivoq.
Tassalu Kalaallit Nunaat USA-p isumannaatsuunissaanut pingaaruteqarluinnartoq.
Donald Trump Jr. Nuummut mittarfimmut marlunngornerup ullaap tungaani mippoq, tikeraarneralu ataataata Donald Trumpip oqaatigisimasaanut takussutissiivoq.
Tassalu Kalaallit Nunaat USA-p isumannaatsuunissaanut pingaaruteqarluinnartoq.
Naleqqap siulittaasua Pele Broberg taama naliliivoq, tikeraarnerlu Kalaallit Nunaata USA aqqutigalugu namminiilivinnissaata anguneqarsinnaaneranik takussutissatut taallugu:
- Kalaallit Nunaata USA-p isumannaatsuuneranut pingaaruteqarnera Trumpip aqutsinerata nalaani 2020-mi isumaqatigiissutigineqarpoq.
- Trumpip tamanna innersuussutigiuarpaa. Maannalu pissutsit allanngoriartortillugit namminiilivinnissaq naalagaaffiup tapiissutaannut tunngassuteqannginnera inuit paasiartorpaat. Namminiilivikkusunnersugut apeqqutaaginnarpoq, Pele Broberg Sermitsiamut oqarpoq.
Tikeraarneq USA-p Kalaallit Nunaata namminiilivinnissaanut tapersersuerusussuseqarneranut ersarissumik takussutissaasoq taanna isumaqarpoq.
USA-lli Kalaallit Nunaat namminiilivitsissinnaanngikkaa naqissuserpaa, taamaattorli:
- USA-p iliuuserisinnaasaa tassaavoq namminiilivinnissamut tunngatillugu oqaatigineqartartut ilaat atuukkunnaarsillugit toqqissisisimalersitsisinnaaneq.
- Ima oqarsinnaapput: Isumannaallisaanerit maanna atuuttut isumagissavagut. Aningaasartai eqqarsaatigeqqunagit namminneq isumagisinnaallugit takutitsipput. Aningaasatigut piumasaqaratik kikkunnulluunniit iliornavianngillat Kalaallit Nunaannulli taamaaliorusunnertik takutikkaat oqaatigineqarsinnaavoq.
Danmarkimi politikerit tikeraartoqarnissaa pillugu ernumassuteqartut ima isornartorsiorpai:
- USA-p 2000-ikkunni pissaaneq atuuttoq uagutsinnut anngunnissaa qallunaat arleqqutigaat.
Brobergip Kalaallit Nunaanni pissutsit Amerikamiut atugaattut pinissaat ernumaginngilaa:
- USA-mik suleqateqarneq, illersornissamut isumaqatigiissut imaluunniit kiffaanngissuseqarluni peqatigiinneq ima paasisariaqanngilaq Danmarkimi pissutsit 1953-imi nunatsinni atuutilersinneqarnikuunerattut USA-mi pissutsit nunatsinni atuutilernissaat.
Trumpip Kalaallit Nunaat ikiorniarlugu sunik piumasaqaateqarnissaa ilimagaajuk?
- Isumaqanngilanga arlaannik piumasaqassasoq. Isumaqarpunga pisariaqartitatsinnik tuniumaaraatigut. USA-mut tunniussarput tassaavoq sumiiffipput. Taakku radarimik ikkussuisinnaapput USA-millu illersuisinnaallutik, tamannalu Naleqqami ajornartorsiutiginngilarput.
