Brobergip siunnersuutaa: Inatsisartuni qallunaatut oqaaseqarneq atorunnaarli
Naleqqap siulittaasuata Pele Brobergip siunnersuutigaa Inatsisartut allaffeqarfianni kalaallisut oqaatsit kisimik atorneqassasut, taamaalilluni pisariillisaasoqarlunilu sipaartoqarsinnaammat.
Pele Brobergip, Inatsisartunut ilaasortap Naleqqallu siulittaasuata, Inatsisartuni suleriaaseq allanngortikkusuppaa allaffissorneq kalaallisuinnaq ingerlanneqarniassammat.
Assiliisoq: Leiff Josefsen
Inatsisartuni allaffissorneq, assersuutigalugu inatsisissatut siunnersuutit aamma paragraf 37-lu naapertorlugu apeqqutit tamarmik qallunaatuunngortinneqartarnerat imaluunniit toqqaannartumik nutserneqartarnerat, atorunnaarsinneqassasoq Pele Brobergip, Naleraq sinnerlugu Inatsisartut suleriaasiannik allannguinissamik siunnersuuteqartussap, siunnersuutigaa.
Folketingimi qallunaatuinnaq Savalimmiunilu Lagtingemi savalimmiormiutuinnaq atuisoqartarneranut taanna innersuussivoq.
Pisortatigoortumik oqaatsit
- Nunat ”Naalagaaffeqatigiit” assigalugit, nunami pisortatigoortumik oqaatsit aallaavigalugit Nunatsinni Inatsisartuvut ingerlatsilertariaqarput. Nunatsinni kalaallisut oqaatsivut pisortatigoortumik oqaasituaapput, Pele Broberg naqissusiivoq, ilassuteqarlunilu:
- Siunertaanngitsumik iluatatsitsilaarniaannarluta Inuiatsinnut artukkiussisussaanngilagut. Immitsinnut aallaavigissaagut. Nunat allat “naalagaaffeqatigisavut” assigalugit iliussaagut.
Brobergip siunnersuutigaa Inatsisartuni ilaasortaq qallunaatuinnaq oqalussinnaappat “oqaatsit allat atornissaannut ammasugut, pineqartoq aamma kalaallisut saqqummiussisinnaappat”, partiip siulittaasua Sermitsiamut itisiliivoq.
- Inatsisit attuumassutillit akuerineqareeraangata oqaatsinut allanut nutserneqarsinnaapput, Pele Broberg oqarpoq maanilu nunami „naalagaaffeqatigiittut taasatsitulli“ iliuuseqartoqartariaqartoq" innersuussilluni.
Siunnersuut tamanna qanoq kinguneqassanersoq Sermitsiap Inatsisartut aqutsisui aperai, sulili akissutissarsinngilaq.
