KL

DK

Bussinik killormut ingerlasoqalernissaa oqaluuserineqassaaq

Sisimiuni bussit illuatungaanut aamma ingerlaartalertariaqarput, taama Steffen Johansen (N) kommunalbestyrelsip ataatsimiinnissaanut siunnersuuteqartoq isumaqarpoq. Bussilli illuatungaanut ingerlasalissappata bussit unittarfiani aqqusinermik nerutunerulersitsineq 370.000 koruunit missaannik akeqassangatinneqarpoq, katillugu millionerpaalunnik akeqassalluni.

Dorthea Reimer-Johansen
Journalist
Offentliggjort

Sisimiuni ulluinnarni bussit ullaakkut nalunaaqutaq 6:15-imit 22:00-mut ingerlaartarput.

Unnukkut nalunaaqutaq 18:00-ip tungaanut ingerlaarneq 20 minutsikkaartikkumallugu ulapaarfiup nalaani bussit marluusarput, matuma kingorna ingerlaarneq 40 minutsikkaalersarpoq bussi ataasiinnaq ingerlaalersarmat.

Bussit ingerlaartarfiat aalajangersimasuuvoq ataasiinnaalluni.

Kommunalbestyrelsimut ilaasortap Steffen Johansenip bussinik angallassineq pitsaanerulersinniarlugu aamma illua’tungaanut ingerlaartalernissaat kissaatigaa.

Sisimiuni bussit katillugit sisamaapput, ulapaarfimmi bussit marluk ingerlaartinneqartarlutik, ulapaarfiup kingorna bussit ataatsit 40 minutsikkaalutik ingerlaartarput. Bussit pingajui ulluni atuarfiusuni ullaakkut atuartut bussiattut atorneqartarpoq, bussillu sisamaat ingerlaarnissamut piareersimasuutigineqartarluni.

Bussit illuatungaanut ingerlaartalissappata bussit unittarfiisa aqqusinertai nerutunerulersinniarlugit suliarineqartariaqarput, taama kommunimi immikkoortortaqarfik naliliivoq:

- Bussinut ingerlaarfiit nutaat atuutilersikkumallugit, bussinut unittarfinni pioreersuni aqqusernit nerutunerulersinneqartariaqarput. Bussit ingerlaarfigisassaattut siunnersuutaasoq atuutilersinneqassappat, Eqqartuussiviup Pissassarfiullu saavanni ilaasut rute 1-imiit 2-mukarfigisinnaasaanni aqqusineq nerutunerulersinneqartariaqarpoq, kommuni allappoq nangillunilu:

-  Siornatigut bussinik illuatungaanut ingerlaartartussanik peqalernissaq isumaliutigineqarnikuuvoq. Bussit aqqusernup qeqqani uninngaqqusaanngimmata, bussinut unittarfiit 14-it allanngortinneqartariaqarput, sumiiffiit aqquserngisa nerutussusaat naammanngitsut kiisalu pisuinnaat ikaartarfii nutaat pisariaqarlutik. Bussit ukiuunerani Glahnsvejimiit Aqqusinersuakkut qummukajaakkut qaqinaveertarput, aamma Glahnsvejip Aqqusinersuullu akornanni krydsi allanngortiterneqartariaqarpoq allanngortiterneqarpat sangoriaata silissusaa naammalissagami.

Kingunerisinnaasai

Bussit illuatungaanut ingerlaartalissappata kingunerisinnaasai arlaqarput. Qeqqata Kommuniata paasissutissiissutigaa ilaasartut amerlasuut bussit ataatsit atortartuuppatigit nammineq biiliminnik ingerlanissamut imaluunniit amerlanerusut taxanik atuisartuunerat taarsiukkaanni atuilluartuunerussasoq, kisiannili ilaasoqarpiarnani aalajangersimasumik ingerlaartarfik bussit ingerlaarfigiuartassappagu atuilluartuunnginnerussasoq.

Aqqusinernik nerutunerulersitsinissaq aamma akisuvoq:

-  Kommunimi aqquserniornissamut atortuutit, soorlu ujaqqat qaartitikkat pigineqarpata, aqqusineq nerutulernerulersinnissaanut aningaasartuutit ingerlatsinermit aningaasartuutigineqarsinnaapput. Ukiuni kingullerni kommunip sanaartortitsineraninngaanniit ujaqqanik qaartitikkanit sinneruttutut atugassanik peqartarsimanngilaq, taamaattumik Eqqartuussiviup Pissassarfiullu saavanni aqqusineq nerutunerulersinnissaa periarfissaasimanngilaq.

-  Bussinut unittarfiup eqqaani aqqusineq nerutulernerulersinneqarnissaa 370.000 koruunit missaanni akeqarpoq. Bussit unittarfii nutaat sanaartorneqarnissaat taamaalillutik 5,7 millionit koruunit tungaannut akeqassapput, matumani Glahnsvejip Aqqusinersuullu akornanni krydsip allanngortiterneqarneranut saniatigut malunnaataasumik aningaasartuutaanissaa naatsorsuutinut ilanngunneqassaaq, kommuni akissummini naggasiivoq.

Siunnersuut Qeqqata Kommuniani sisamanngorpat juunip ulluisa 27-anni oqallisigineqassaaq.

vejbredde udvidelse sisimiut samfund qeqqata kommunia offentlig transport kommunalbestyrelsen inuiaqatigiit buskørsel steffen johansen

ATORFIIT Se alle jobs

Powered by Labrador CMS