Canada akitsuutit pillugit USA-mik isumaqatiginninniarnerni imminut illersorniartoq

Canadap naalakkersuisuisa nunaminni sulisartunut suliffeqarfinnullu akitsuutit pillugit USA-mik isumaqatiginninialeruttornerni illersuinertik attatiinnarniarpaat.

Canadap ministeriunera Michael Carney inoqatinut attaveqaqatigiittarfimmi X-imi Danmarkimi nalunaaqutaq naapertorlugu tallimanngornermi ullaakkut taama allappoq.

- Taakkununnga illersuinerput akitsuusiinissamut piffissaliussap nutaap, tassa aggustip aallaqqaataata nallernissaata tungaanut attatiinnarniarparput, taanna allappoq.

USA-p præsidentia, Donald Trump, nioqqutissanut Canadamiit eqqusuussanut 35 procentimik aggustip aallaqqaataani akitsuusiinissaminik nalunaaruteqareersorlu, Michael Carney taama allappoq.

Canadap qarasaasiakkut kiffartuussinermut akileraarusiinera Amerikami suliffeqarfiinut eqquisussaassanera nioqqutissanut eqqussuussanut akitsuusiiniarnermut peqqutigigini, Trumpip oqaatigaa.

Taamatuttaaq Canada ikiaroornartunik sakkortuunik fentanylinik USA-mut anngiortumik eqqussuisoqartarneranut tunngatillugu iliuusikippallaartoq, Trumpip Carneymut allakkamini nammineq atsiukkamini aamma eqqaavaa. 

Trumpip allakkani taakkua inoqatinut nammineq attaveqaqatigiittarfiutimini Truth Socialimi saqqummiuppai.

Carney Trumpip taama allagaqarnera X-imi oqaaseqarfigaa.

- Canada fentanylip Amerika Avannarlermi ajornartorsiutaanerajussuata anigornissaanut iliuuseqangaatsiarnikuuvoq. Nunatsinni USA-milu inunnik annaassisinnaajumalluta nunanilu taakkunani inuiaqatigiit illersorniarlugit USA-mik tamatumani suleqateqarnitta attatiinnarnissaa aalajangiusimavarput, taanna allappoq.

Canada USA-p taamaaliorneranut akissutitut nioqqutissanut USA-miit eqqussuussanut aamma akitsuusiiniarnersoq, taassuma oqaatiginngilaa.

Canada taamaaliussagaluarpat USA akissutitut assinganik iliorumaartoq, Trump Carneymut aamma allappoq. 

Taamaaliortariaqalissagunilu 35 procentimik akitsuusiinissi qaavatigut akitsuuseeqqissalluni aamma allappoq.

Canadap fentanylimik UAS-mut anngiortumik eqqussuisoqartarnerata akiornissaanut suleqatigerusussappani nalimmassaanissi immaqa isumaliutigiumaarini, Trump allakkamini ilaatigut naggasiutigaa.

- Akitsuusiinikka qaffariaannaavakka appariaannaallugilluunniit, nunatta nunassilu akornanni pissutsit qanoq innersut apeqqutaalluni, Trump naggasiivoq.

Trump nioqqutissanut Canadamiit eqqussuussanut akitsuusiiniarluni aatsaat nalunaaruteqalinngilaq. Nioqqutissanummi Canadamiit eqqussuussanut 25 procentinik akitsuusiiniarluni februaarimi aamma nalunaaruteqarpoq.

Taamaaliornissili tassa kinguarteqqippaa.

/ritzau/