ISSITTUMI NUNANUT ALLANUT PERIUSISSIAQ
Canada Nuummi sinniisoqarfeqalissaaq
Issittumi nunanut allanut politikkimut nutaamut atatillugu Canadap Kalaallit Nunaannut attaveqarnini pitsanngorsarniarlugu Nuummi aallartitaqarfeqalissalluni aalajangerpoq.
Canadamiut Kalaallit Nunaanni soqutigisaannik pitsaanerusumik siuarsaanissaq qulakkeerniarlugu Nuummi upernaaru sinniisoqarfeqalernissaq Canadamiut naalakkersuisuisa aalajangiuppaat.
- Ukiut ingerlaneranni Canadami Kalaallit Nunaannilu naalakkersuisut assigiinngitsut akornanni inuillu kattuffiisa akornanni attaveqatigiinnerit arlallit, pisortatigoortut pisortatigoortuunngitsullu, pilersinneqarsimapput. Ukiuni kingullerni nunat marluk akornanni suliniutit arlallit siuarsarneqarput, ilaatigut Pikialasorsuaq pillugu suleqatigiinnissamik siunnerfik (2023) aamma Kalaallit Nunaata Nunavullu naalakkersuisuisa isumaqatigiissutaat (2022). Suleqatigiinnerilli manna tikillugu aaqqissuussaagimanngilaq, nunanut allanut politikkimut atasumik sinaakkuteqarani ingerlasimavoq, periusissiami allassimavoq.
Kalaallit Nunaata pingaaruteqarnera annertusiartorpoq
- Kalaallit Nunaata issittumi suleqataasutut pingaaruteqarnera annertusiartortoq nassuerutigineqarpoq, Canadallu soqutigisai pitsaasumik siuarsarneqarsinnaassappata Kalaallit Nunaat, aamma Nunavummi naalakkersuisut, ataqatigiinnerusumik iliuuseqarfigineqarnissaat pingaarnersiugassatut isigineqarpoq, nalunaarummi erseqqissarneqarpoq.
Canadamiut naalakkersuisui isumaqarput Nuummi sinniisoqarfeqalernissaq "Canadamiut Kalaallit Nunaanni soqutigisaannik ataqatigiissaarinermut siuarsaaniarnermullu iluaqutaalluassasoq, nunat marluk akornanni niuernikkut attaveqatigiinnerit nukittorsarlugit, ilisimatusarnikkut suleqatigiinneq ajornannginnerulersillugit politikkikkullu suliassaqarfinni assigiinngitsorpassuarni akuunerulersitsissalluni suleqatigiinneq annertusissallugulu“.
Kalaallit Nunaata Canadami sinniisoqarfimmik ammaaniarluni aalajangernera maluginiarneqarpoq, tamannalu nunami nuannaarutigineqarpoq.
Kalaallit Nunaanniinnaanngitsoq aammali Alaskami Anchoragemi Canada sinniisoqarfimmik ammaassaaq.
Canadap Issittumut tunngatillugu nunanut allanut politikkia nutaaq decembarip arfernani saqqummiunneqarpoq, taannalu uani atuarneqarsinnaavoq: Canada’s Arctic Foreign Policy
