Cykelit innaallagiatortut maanna Kalaallit Nunaanni inatsisitigut akuerisaalerput

Cykelit innaallagiatortut Kalaallit Nunaanni immikkut malittarisassaqanngitsut, taamaattumillu knallertit malittarisassaat malillugit oqartussat naliliisariaqartut, siorna oktobarimi Kalaallit Nunaanni Politiit nalunaarput. Cykelit innaallagiatortorpassuit inerteqqutaanerannik tamanna isumaqarpoq.

Naalakkersuisut akuliupput danskit naalakkersuisui inatsisinik nutaanik suliaqarnissaannik qinnuigalugit, maannalu tamanna iluarsineqarpoq, juunillu aallaqqaataa aallarnerfigalugu inatsisit nutaat atuutilersinneqarput, taakkualu malillugit cykelit innaallagiatortut inerteqqutaajunnaarput.

Ineqarnermut attaveqaasersuutinullu naalakkersuisoq Hans Peter Poulsen (S) tusagassiuutinut nalunaarummi taama ilisimatitsivoq:

Mianersornissamik kaammattuisoq

- Cykelit innaallagiatortut atornissaat inatsisitigut akuerisaalermat naammagisimaarnarpoq. Cykelit innaallagiatortut assartuutitut sunniuteqarluarsinnaapput, pisut ilaanni biilinut taarsiunneqarsinnaallutik, taamatullu takornariartitsinermik inuussutissarsiornermi atorneqarsinnaallutik, naalakkersuisoq taama oqaaseqarpoq, cykelinilli innaallagiatortunik atuisut mianersornissaannik kaammattuilluni:

- Cykelit innaallagiatortut amerlanerulerneranni aqqusinerni pisuinnaallu aqqutaanni angallattoqarnerulersinnaavoq. Tassunga atatillugu angallannermi kikkut tamaasa mianersuussisaqqullugit kaammattorusuppakka, taamaalillutik cykelit innaallagiatortut taakkua ajutoornernik kinguneqannginniassammata.

Løbehjulit maannakkut allanngortitsinermi ilaatinneqanngitsut, kingusinnerusukkulli allanngortitsinermi ilanngunneqarsinnaasut, naalakkersuisup ilanngullugu erseqqissaatigaa.

Cykelinut inaallagiatortunut maleruagassat imaapput:

• Cykelit ataasiinnarmik motooreqarsinnaapput.
• Taamaallaat tukkartortilluni motoori ikiuutissaaq, taamaattoq 6 km/t tikillugu ikiuuteqarsinnaavoq (pisuttutut sukkatigisoq)
• Motoori annerpaamik 750 watt-inik sakkortussuseqassaaq.
• 25 km/t tikillugu motoori taamaallaat ikiuussinnaassaaq.
• Bremsinut, qullernut, atortunullu allanut tunngatillugu nalinginnaasumik cykelinut malittarisassat atuutissapput.
• Cykelertoq cykelertilluni niaquarnaveeqquteqassaaq