Danmarkimi aningaasanut inatsit ilinniartunut timmisartumut bilitsinik akikillisitsisoq
Meeqqat kalaallit Danmarkimi angerlarsimaffiup avataanut inissinneqartarnerannik pinaveersaartitsineq aamma ilinniartunut timmisartumut bilitsit akikinnerusut IA-p Danmarkimi aningaasanut inatsit pillugu isumaqatiginninniarnermi pingaarnerpaatippai.
- Ilinniartortatsinnut Danmarkimiit Kalaallit Nunaannut siumut utimullu bilitsit 1000 koruuninik akeqalernissaat qulakkeerparput, Danmarkimilu ilinnialernermi naammassilernermilu pitsaanerusumik siunnersorneqartarnissaat qulakkeerlugu, taamaalillutik Kalaallit Nunaannut attaveqarnertik pitsanngorsinnaaqqullugu, Aaja Chemnitz (IA) ilisimatitsivoq.
Arktisk foto: Leiff Josefsen
Danmarkimi 2025-mut aningaasanut inatsit pillugu politikkikkut isumaqatigiissut tallimanngormat saqqummiunneqarpoq, taamaalillunilu kalaallit Folketingimi ilaasortaatitaasa isumaqatiginninniarnerat naammassilluni.
Pisarnertut kalaallit ilaasortat marluk Atlantikup Avannaanut aningaasaliissutit, aningaasat Kalaallit Nunaannut Savalimmiunullu suliniutinut atorneqarsinnaasut, sammivaat.
IA-p meeqqat inuusuttullu isumaqatiginninniarnermi pingaarnerpaatikkai folketingimut ilaasortaq Aaja Chemnitz (IA) Sermitsiamut oqarpoq:
- Ilinniartortatsinnut Danmarkimiit Kalaallit Nunaannut siumut utimullu bilitsit 1000 koruuninik akeqalernissaat qulakkeerparput, Danmarkimilu ilinnialernermi naammassilernermilu pitsaanerusumik siunnersorneqartarnissaat qulakkeerlugu, taamaalillutik Kalaallit Nunaannut attaveqarnertik pitsanngorsinnaaqqullugu.
- Avalak kalaallillu ilinniagaqartut siunnersuutaannut suleqatigilluarnerannullu immikkut qujaffigerusuppavut, Aaja Chemnitz aningaasanut inatsisissatut isumaqatigiissutip saqqummiunneqarneranut atatillugu allakkatigut taama qisuariarpoq.
Filmiliorneq kulturilu aamma aningaasaliiffigineqartut
IA-p kalaallit meerartaasa Danmarkimi angerlarsimaffiup avataanut inissinneqartarnerisa pinaveersaartinnissaat anguniaraa ilanngullugu eqqaavaa:
- Angerlarsimaffiup avataanut inissinneqarsimasut amerlapput, ajoraluartumillu kalaaliuneq pissutigalugu immikkoortitsisoqartarpoq. Tamanna allanngortinniarlugu sulissutigaarput.
Politikeri naapertorlugu kalaallit filmiliortarnerat kulturiallu aamma pingaartinneqarput, Norddok III-lu Savalimmiuni suleqatit peqatigalugit ingerlateqqinneqassaaq:
- Kalaallit Nunaanni nammineq oqaluttualiornissaq kulturitta ineriartortinnissaanut pingaaruteqarpoq, filmiliortarnerlu inuussutissarsiutitut isigineqartariaqarluni. Kalaallit Nunaanni filmiliornermik ilinniarfik pilersinneqassappat, nammineq filmiliornissamut aningaasaliisoqarnissaa takorusuppara. Aamma Kalaallit Nunaat Tivolimi atugassanik aningaasanik qulakkeerinninnerput nuannaarutigaara, Aaja Chemnitz aningaasanut inatsisissatut isumaqatiginninniarnerit inerneri pillugit oqarpoq.
Norddok kalaallit savalimmiormiullu piviusulersaarusiortartut Det Danske Filminstitut aqqutigalugu maannamut qinnutigisinnaasaraat. Aningaasanik qinnuteqartoqarsinnaaneranut piumasaqaataat tassaavoq ”suliniut pineqartoq Kalaallit Nunaanni Savalimmiuniluunniit filmiliortartut piginnaanngorsagaanerannik attaveqaqatigiinnerannillu ineriartortitsinermut peqataassasoq”.
Suliniutit aningaasaliiffigineqartullu Aaja Chemnitzip danskit naalakkersuisuinik isumaqatiginninniarnermini angusai ataani takuneqarsinnaapput:
