Dronet pissutigalugit pissutsit allanngorluinnarput.
Sapaatip-akunnerani kingullermi Københavnip mittarfiata kingusinnerusukkullu Aalborgip mittarfiata akunnerni arlalinni dronenit akornuserneqarnerata kingorna danskit naalakkersuisui taama isumaqarput.
Dronet pissutigalugit pissutsit allanngorluinnarput.
Sapaatip-akunnerani kingullermi Københavnip mittarfiata kingusinnerusukkullu Aalborgip mittarfiata akunnerni arlalinni dronenit akornuserneqarnerata kingorna danskit naalakkersuisui taama isumaqarput.
Arlaannaataluunniit suli ersarissumik oqaatiginngilaa, kisianni oqallisigineqartarpoq dronerpassuit aamma sakkutooqarfiit qanittuani takuneqartartut naalagaaffimmit akeqqersimaartumit pisuusut — naalagaaffik pisinnaasaqarluartumik taaneqarluni. Taama oqallittoqartillugu Rusland eqqarsaatigineqartarpoq.
Dronet tikiunneranni takutinneqarpoq Danmark dronenut illersorneqarsinnaanngitsoq – taamaattumillu Danmark sapaatip akunnerata siuliani EU-mi ataatsimeersuarfiunerani, danskit naalakkersuisui silaannaq illersorniarlugu ilaatigut Frankrigimut, Tysklandimut, Sverigemut Norgemullu ikiortissarsiorput.
Dronenik inerteqqut
Tamatuma saniatigut Danmarkimi dronenik ingerlatsineq inerteqqutigineqarpoq, tamannalu suliffeqarfinnut dronenik inuussutissarsiutigalugu atuisartunut eqquivoq.
- Dronenik inerteqquteqarneq Kalaallit Nunaanni atuutinngilaq, kisianni Kalaallit Nunaanni Politiit kunngeqarfimmi politiit allat assigalugit upalungaarsimanerulerput, Kalaallit Nunaanni Politiit Sermitsiamut ilisimatitsipput.
Kalaallit Nunaat dronenut nammineq malittarisassaqarpoq, Danmarkili EU-p maleruagassiaanik malinnilluni. Tassani ilaatigut allassimavoq oqartussanit akuersissuteqartoqanngikkaangat namminersortut dronenik ingerlatsiniarnerat mittarfinnit 5 kilometerisut ungasitsigisumiit sakkutooqarfinniillu 8 kilometerisut ungasitsigisumiit pisassasoq.
Ajornartorsiut annertooq
Inuit namminneq pigisaat dronet Danmarkimi mittarfinni ajornartorsiutaasarsimapput. 2023-mi kvartalimi kingullermi Aalborgimiinnaq 40-riarlutik akornutaasarsimapput.
Siorna maajip 22-ani Aalborgimi timmisartoqarfik minutsini qulini matoqqavoq dronet qanittuani atorneqarnerat pissutigalugu.
- Dronemik aqutsisoq 5000 koruuninik akiligassinneqartarpoq. Aamma annertuumik taarsiisussanngortitaanissaq sillimaffigineqartariaqarpoq. Taarsiisussaatitaanerlu timmisartoqarfiup matoqqanerani minutsimut 50.000 koruuniusinnaasarluni.
Tamanna pillugu Sermitsiap Greenland Airports aperaa Kalaallit Nunaanni assingusunik pisoqarsimanersoq. Taamaattoqarsimanngilarli.
- Tamanna paasiniarpara, timmisartoqarfiutitsinnili taamaattoqarsimanngilaq, Greenland Airportsimi attaveqaqatigiinnermut pisortaq Mikkel Bjørnø Lund oqarpoq.
