Danmarkimi illoqutiigiit affai sinnerlugit 72 tiimit tungaanut sillimmatinik peqanngillat
Danskit 34 procentiisa peqqumaasersornissamik oqartussaasut kaammattuutaat naapertorlugu iliorput, misissuinerup nutaap tamanna takutippaa, DR allappoq.
Upalungaarsimanermut aqutsisoqarfik ilaatigut inassuteqarpoq, inumut ataatsimut ullormut 3 literinik imermik peqqumaateqartoqassasoq aammalu nerisassanik sivisuumik piusinnaasunik pisariunngitsumillu nerisassiarineqarsinnaasunik peqartoqassasoq.
Foto (arkiv): Mads Claus Rasmussen/Ritzau Scanpix
Danskit affaanit amerlanerit naalagaaffiup oqartussaasullu siunnersuutaat malillugit angerlarsimaffimminni sillimmasiissutinik peqanngillat.
Tamanna DR-ip Epinionimut misissuisitsinerata takutippaa.
Tigussaasunngorlugu danskit 62 procentii erseqqissumik akipput, siunnersuutit malillugit piareersarsimanatik. Siunnersuutit tassaapput nerisassanik imermillu ulluni pingasuni naammattunik peqarnissaq. 34 procentit akipput, siunnersuutit malillugit piareersimasuuteqarlutik.
Siunnersuutit siullermeerlutik nalunaarutigineqarput ukiup ataatsip missaa matuma siorna - 15. juni 2024 - taamani illersornissamut ministeri Troels Lund Poulsen (V) aamma upalungaarsimanermut pisortaq Laila Reenberg tusagassiortunik katersortitsinermi saqqummiussimmata.
Danskit - isumannaatsuunngitsumik inissisimaneq pissutigalugu aammalu atortulersuutit pingaarutillit pilersuinermullu saassussisoqarsinnaaneranut aarlerinaatit pissutigalugit - imermik nerisassanillu nillataartitsivimmiittariaqanngitsunik katersillutik piareersimassuuteqarnissaat, ulluni pingasunut naammattussanik peqqumaateqarnissaat kaammattuutigineqarpoq.
Danskisut taamak piareersarneq preppingimik taaguuteqartinneqarpoq.
Inuiaqatigiinni isumannaatsuunissamut upalungaarsimanermullu ministeri Torsten Schack Pedersen (V) DR-imut nassuerpoq, danskit piareersarnissaat pillugu annertunerusumik iliuuseqartoqartariaqartoq.
- Taamaattumik piffissami aggertumi annertunerusumik iliuuseqarnissaagut. Tassami pissusissamisuussanngilaq, uagut nammineq pisinnaasugut, oqartussaasut iliuuseqartussatut isumalluutigiinnassagutsigit, taanna oqarpoq.
Voxmeterip decembarimi misissuinerani aamma ersersitsivoq iliuuseqartut iliuuseqanngitsullu avissimasut, tassa danskit amerlanerussuteqartut piareersimanngitsut.
Tigussasumik danskit 50,7 procentii taamani akipput innersuussutinik malinnissimanatik.
Voxmeterip misissuinerata taamaalilluni takutippaa innersuussutigineqartoq pillugu avissaartuuttoqartoq. Tassami aamma amerlanerussuteqartut tamakkiisumik imaluunniit ilaannakortumik innersuussutinik malinnissimammata.
37,4 procentit innersuussutinik ilaannakortumik malinnissimapput, 10 procentillu tamakkiisumik malinnissimallutik.
Naalagaaffiup oqartussat ilaatigut inassutigaat, inuk ataaseq ullormut imermik 3 literit piareersimatitsisoqassasoq.
Tassunga ilanngullugu aamma oqaatigineqarpoq, inoqutigiinni ullut pingasut nerisassanik peqartoqartariaqartoq. Tassa nerisassat sivisuumik nillataartitsivimmiinnatik uninngasinnaasut peqqumaasersuutigineqassasut.
