Danmarkip nunat arlallit Atlantikup avannaani sakkutooqarnikkut suleqatiginerulerniarlugit isumaqatigiissuteqarfigai
NATO-p Haagimi ataatsimeersuarnerani Danmarki, Canada, Tyskland Norgelu imarsiornermi isumannaallisaanermut Atlantikullu avannaani sakkutooqarnermi suleqatigiinnermut atatillugu isumaqatigiissuteqarput.
- Canadamik, Tysklandimik Norgemillu suleqateqarnerup illersornissamut tunngasunik nutaaliorneq illersornissamullu tunngasunik suliffissuaqarneq Atlantikup Avannaani isumannaatsuunermut tunngatillugu malunnaatilimmik ukkatarinnittoqarneruliissaaq. Tamannalu sukkanerusumik, pitsaanerusumik nunamilu sunniuteqarluarnerusumik qulakkeerneqassaaq, illersornissamut ministeri Troels Lund Poulsen oqarpoq.
Assi: Ludovic Marin/Reuters/Ritzau Scanpix
NATO-p Haagimi ataatsimeersuarnerani illersornissamut ministeri Troels Lund Poulsen Canadap, Tysklandip Norgellu illersornissamut ministerii atsioqatigai.
Nunat taakkua sakkutooqarnermut tunngasuni assigiinngitsuni, soorlu illersornissamut tunngatillugu nutaaliornermut, sakkutooqarnermi atortussanut, illersornissamut tunngatillugu suliffissuaqarnermut sungiusarnernullu tunngatillugu suleqatigiinnissamik isumaqatigiissuteqarput. Illersornissamut ministeriaqarfik tusagassiuutinut nalunaarummi allappoq.
Atlantikup avannaani Issittumilu isumannaatsuunissaq naalakkersuisunit pingaartinneqartoq Troels Lund Poulsen oqarpoq:
- Kalaallit Nunaata Danmarkillu Issittumi Atlantikullu avannaani nakkutilliinerup annertusarnissaannik suliniutinut 14,6 milliardit koruuninik aningaasaliiniarlutik januaarimi isumaqatigiissutigaat.
- Illersornissamut tunngasutillugu nutaaliornissamik suliffissuaqarnermullu Atlantikup Avannaani isumannaatsuunermut Canadamik, Tysklandimik Norgemillu suleqateqarnikkut aallussinerulissaagut. Tamannalu sumiiffimmi sukkanerusumik, pitsaanerusumik sunniuteqarluarnerusumillu qulakkeerinnissaaq, illersornissamut ministeri Troels Lund Poulsen oqarpoq.
Timmisartoq nutaaliaasoq
Isumaqatigiissut timmisartumik alapernaarsuummik nutaaliaalluinnartumik P-8 Poseidonimik atuisinnaalernissamik malitseqartoq ministeri TV2-mut oqarpoq.
Danmark Canadap, Norgep Tysklandillu timmisartuinik atuisinnaalerniarluni akiliisassasoq isumaqatigiissutigineqarpoq. P-8 Poseidonip aqqartartut ilaatigut ujarsinnaassavai.
USA-p præsidentiata Donald Trumpip Danmarkip Kalaallit Nunaata imartaani nakkutilliinnginnera pillugu sakkortuumik isornartorsiornikuuaa.
